Італійская фінансавая паліцыя знайшла ў Нэапалі падпольную тыпаграфію, у якой было надрукавана 12 мільёнаў фальшывых эўра.

Фальшываманетчыкі друкавалі купюры 20 ды 50 эўра. Уся друкаваная прадукцыя і прадметы злачынства канфіскаваныя. Арыштаваных тры чалавекі, распачатая крымінальная справа паводле факту фальшывага друкаваньня купюраў.

Але гэта ня першы выпадак такога злачынства на тэрыторыі Італіі. Так, у горадзе Казэрта, што блізу Нэапалю, паліцыя ліквідавала яшчэ адную падпольную тыпаграфію, дзе таксама друкаваліся фальшывыя эўра. Тады было вынята 400 тысячаў эўра падробных банкнотаў наміналам у 50 эўра, а таксама 30 тысячаў аркушаў спэцыяльнай паперы і арыштаваныя два чалавекі.