17 лістапада ўрад Нідэрляндаў прыняў рашэньне аб поўнай забароне нашэньня ў публічных месцах ісламскай чадры, што адбылося пасьля напружаных дзесяцігадовых дэбатаў. “Урад лічыць непрымальным, каб тканіны, якія закрываюць твар, выкарыстоўваліся ў публічных месцах, сыходзячы зь меркаваньняў публічнага парадку, бясьпекі і аховы чалавека”, - паясьнілі прадстаўнікі галяндзкага ўраду.

Дзейнае заканадаўства часткова забараняе нашэньне “хіджаба” – хусткі, што хавае цела з галавы да ног, і “буркі”, якая закрывае цалкам твар і пакідае бачнымі толькі вочы, у публічных месцах і ў школах краіны,. Некаторыя мусульманскія галяндзкія арганізацыі мяркуюць, што забарона на нашэньне “буркі” можа зьняважыць больш за мільён мусульманаў – менавіта столькі цяпер пражывае ў краіне, хаця чадру носяць толькі некалькі дзясяткаў жанчынаў. Раней спэцыяльная камісія прыйшла да высновы, што такая забарона не супярэчыць галяндзкім законам.

Пляны ўраду, паводле Guardian, моцна разыходзяцца зь лібэральным іміджам краіны, дзе дазволеная эўтаназія і якая праяўляе цярплівасьць да наркаманаў і прастытутак. 

Сацыяльнае і рэлігійнае напружаньне значна ўзрасло ў апошнія гады, асабліва пасьля забойства ў 2004 годзе кінарэжысэра Тэа Ван Гога актывістам мараканскага паходжаньня за тое, што той у сваіх творах паказваў лёсы жанчынаў у ісламскім грамадзтве.