Беларуская дэлегацыя прадставіла на разгляд Трэцяга Камітэту Генэральнай Асамблеі ААН праект рэзалюцыі пра сытуацыю ў сфэры дэмакратыі і правоў чалавека ў ЗША. Беларусь заклікала асудзіць ЗША за сыстэматычнае парушэньне падставовых правоў і свабодаў чалавека у гэтай краіне, ў тым ліку за абмежаваньне свабоды друку і жорсткі кантроль над сродкамі масавай інфармацыі. У прыватнасьці, ў беларускім праекце рэзалюцыі аб сытуацыі з правамі чалавека ў ЗША гаворыцца аб адвольных і таемных затрыманьнях і арыштах, шырокамаштабных выпадках праяваў нецярплівасьці, ксэнафобіі і дыскрымінацыі. У праекце адзначаецца, што выбарчая сыстэма ЗША не адпавядае міжнародным патрабаваньням і вядзе да таго, што шматлікія грамадзяне ЗША пазбаўленыя права браць удзел у галасаваньні. Беларусь прапануе асудзіць ЗША за прымяненьне сьмяротнага пакараньня датычна непаўнагадовых і псыхічна хворых асобаў. Акрамя таго, прапануецца закрыць усе сакрэтныя турмы і прыцягнуць да адказнасьці вінаватых у іх існаваньні.

     Са свайго боку ЗША, краіны Эўрапейскага Зьвязу і Канада прапанавалі дэлегатам Трэцяга Камітэту Генэральнай Асамблеі асудзіць парушэньне правоў чалавека ў Беларусі. У праекце рэзалюцыі гаворыцца, што ў краіне пашыраецца практыка прыцясьненьня і крымінальнага перасьледу прадстаўнікоў апазыцыі, праваабаронцаў, журналістаў і няўрадавых арганізацыяў.