3 лістапада на чарговым паседжаньні Палаты прадстаўнікоў Нацыянальнага Сходу Рэспублікі Беларусь быў разгледжаны й прыняты ў першым чытаньні законапраект “Аб унясеньні зьменаў і дапаўненьняў у Крымінальны й Крымінальна-працэсуальны кодэксы Рэспублікі Беларусь”, накіраваны на ўдасканаленьне крымінальна-працэсуальнага заканадаўства Беларусі.

     Адна са зьменаў заключаецца ў зьмяньшэньні мінімальнага памеру закладу, які зьяўляецца адной зь мераў стрыманьня, з 500 да 100 базавых велічынь. Згодна зь ім, пракурору даецца права прымаць рашэньне аб вызваленьні ад крымінальнай адказнасьці непаўнагадовага, што ўчыніў правапарушэньне, якое не ўяўляе сабой вялікай грамадзскй небясьпекі, зь перадачай яго пад нагляд бацькоў. Вялікія дыскусіі выклікала прапанова з боку Нацыянальнага цэнтру законапраектнай дзейнасьці аб неабходнасьці падаўжэньня тэрміну ўтрыманьня пад вартай асобы, што абвінавачваецца ў злачынстве, на тэрмін, неабходны для разгляду гэтай крымінальнай справы ў судзе. Запатрабаванасьць такога падаўжэньня тэрміну тлумачыцца павелічэньнем складаных справаў і неабходнасьцю большай колькасьці часу для вынясеньня рашэньня судзьдзёй. Хаця й гэтая прапанова была жорстка раскрытыкаваная, ў выніку яна была прынятая ў тым выглядзе, ў якім была прадстаўленая распрацоўнікамі.

     Сярод іншых прынятых законапраектаў варта адзначыць і праект закона “Аб унясеньні зьменаў і дапаўненьняў у некаторыя заканадаўчыя акты Рэспублікі Беларусь па пытаньнях усталяваньня сапраўднасьці дакумэнтаў аб адукацыі”. Згодна зь ім, працадаўца пры наяўнасьці абгрунтаваных сумневаў у сапраўднасьці дакумэнтаў аб вышэйшай адукацыі асобы, што ўладкоўваецца на працу, і кіраўніка адукацыйнай установы пры паступленьні на навучаньне, мусяць накіроўваць адпаведны запыт у Міністэрства адукацыі Беларусі. У першым чытаньні быў прыняты і праект закону “Аб унясеньні зьменаў і дапаўненьняў у некаторыя законы Рэспублікі Беларусь і прызнаньні пра страце сілы Пастановы Прэзыдыюму Вярхоўнага Савету Рэспублікі Беларусь “Аб рэарганізацыі справы гісторыка-культурнай спадчыны ў Рэспубліцы Беларусь”. Законапраект прадугледжвае ўнясеньне зьменаў і дапаўненьняў у семнаццаць (sic!) законаў Рэспублікі Беларусь.