Не зважаючы на шматлікія пярэчаньні з боку дэмакратаў і некаторых рэспубліканцаў, прэзыдэнт Злучаных штатаў Амэрыкі Джордж Буш падпісаў 26 кастрычніка Закон аб будоўлі муру на мяжы з Мэксыкай у мэтах спыненьня незаконнай іміграцыі.

      Даўжыня муру дасягае 1100 км. “Гэты законапраект дапаможа абараніць амэрыканскі народ і ўзмацніць сачэньне на мяжы. Ён зьяўляецца неабходным крокам да міграцыйнай рэформы”, - заявіў Буш падчас кароткай цэрэмоніі ў залі імя Рузвэльта ў Белым Доме. 

     Закон аб муры ёсьць часткай праграмы амэрыканскага ўраду, якая ажыцьцяўляецца ў мэтах разьвязаньня праблемы незаконнай міграцыі і на якой на сёньняшні момант сканцэнтраваныя вялікія намаганьні ўраду з нагоды будучых парлямэнцкіх выбараў 7 лістапада. Памянёны мур мусіць быць пабудаваны на тэрыторыі ўсіх штатаў, што мяжуюць з Мэксыкай: Каліфорніі, Арызоны, Нью-Мэксыка й Тэхасу. Акрамя таго, па словах Буша, прадугледжваецца ўсталяваньне кантрольна-прапусковых пунктаў, камэраў відэаназіраньня  і іншых найноўшых вайсковых сыстэмаў для памежнага назіраньня. У сваю чаргу, прэзыдэнт Мэксыкі Вісэнтэ Фокс параўнаў гэты мур з “ганебным мурам”, сканструяваным у Бэрліне ў 1961 г. Ён заявіў: “Гэта немагчыма, што ў 21 стагодзьдзі мы будуем муры паміж дзьвюма суседзкімі, брацкімі й партнэрскімі нацыямі. Гэта ёсьць дрэнным сыгналам таго, што ня ўсё добра ў дзяржаве, якая пазыцыянуе сябе як дэмакратычная краіна, як краіна імігрантаў”.

     Паводле адзнакаў экспэртаў, на сёньняшні момант у ЗША знаходзяцца блізу 11 мільёнаў мэксыканцаў, палова зь якіх - нелегалы. У 2005 годзе імігранты пераслалі ў сваю краіну каля 20 000 даляраў, што зьяўляецца другой па памеры крыніцай фармаваньня мэксыканскага бюджэту пасьля экспарту нафты.