11-га кастрычніка  Беларусь афіцыйна прадставіла да разгляду Трэцім Камітэтам Генеральнай Асамблеі ААН праект рэзалюцыі аб умацаванні каардынацыі  і супрацоўніцтва ў сферы барацьбы з рабствам і гандлем людзьмі.

Дакумент адрозніваецца ад папярэдніх тым, што ўпершыню акрэслена гаворыць аб адказнасці тых, хто карыстаецца паслугамі ахвяраў гандлю людзьмі. Ён прадугледжвае захады, што накіраваныя на ліквідаванне попыту на “жывы тавар”, барацьбу з самімі гандлярамі і аказанне дапамогі тым, хто робіцца іх ахвярамі.

Праект рэзалюцыі заклікае дзяржавы ААН забяспечыць паліцыю, пракуратуру і органы сацыяльнай аховы рэсурсамі, неабходнымі для барацьбы з гэтай з’явай, і развіваць кантакты паміж краінамі паходжання, транзіту і накіравання, асабліва паміж іх праваахоўчымі органамі.

Акрамя таго, прапануецца садзейнічаць фізічнай і псіхалагічнай рэабілітацыі і сацыяльнай рэінтэграцыі асобаў, што сталі ахвярамі эксплуатацыі, гвалту і жорсткага абыходжання ў выніку сучасных формаў рабства і гандлю людзьмі.

Прадугледжваецца стварыць пры аддзяленні ў ААН у Вене (Аўстрыя) працоўную групу па гандлі людзьмі з удзелам зацікаўленых дзяржаваў, адпаведных інстытуцыяў, фондаў, праграмаў ААН, а таксама Міжнароднай арганізацыі крымінальнай паліцыі (Інтэрпол). Дзяржавы-чальцы ААН павінны паведамляць каардынатару гэтай групы аб усіх выпадках, звязаных з гандлем людзьмі.