Прэзыдэнт Беларусі Аляксандр Лукашэнка ўзгадніў канцэпцыю праекта новага Закона РБ “Аб прафэсійных саюзах” і падпісаў Загад № 605 “Аб некаторых пытаньнях дзяржаўнай рэгістрацыі грамадзкіх аб’яднаньняў і іх зьвязаў (асацыяцыяў)”. Прэс-служба кіраўніка дзяржавы паведаміла, што дакумэнты падрыхтаваныя ў мэтах рэалізацыі падыходаў, накіраваных на разьвіцьцё прафсаюзнага руху ў краіне, замацаваных у Пасланьні Прэзыдэнта да беларускага народа і Нацыянальнага схода 2006 года.

      Канцэпцыя, падрыхтаваная ўрадам у плянавым парадку, прадугледжвае распрацоўку праекта новага Закона “Аб прафэсійных саюзах” з тым, каб комплексна і сыстэмна ўрэгуляваць пытаньні, зьвязаныя са стварэньнем, рэгістрацыяй і дзейнасьцю прафсаюзаў, іх арганізацыйных структураў, саюзаў (асацыяцыяў) прафсаюзаў.

Уводзіцца новы від прафсаюзаў – без стварэньня юрыдычнай асобы, для якіх не патрабуецца наяўнасьць юрыдычнай адрэсы. Такія парфсаюзы ня будуць падлягаць дзяржаўнай рэгістрацыі, але будуць ставіцца на ўлік у адпаведныя мясцовыя выканаўчыя і распарадчыя органы. Таксама ўсталёўваецца крытэр прадстаўніцтва прафсаюзаў для ўзаемадзеяньня з органамі дзяржаўнай улады па рашэньні пытаньняў сацыяльна-эканамічнага разьвіцьця краіны, а таксама вядзеньня калектыўных перамоваў і ўкладаньне калектыўных дамоваў.

     Загад “Аб некаторых пытаньнях дзяржаўнай рэгістрацыі грамадзкіх аб’яднаньняў і іх саюзаў (асацыяцыяў)” прадугледжвае элімінацыю Рэспубліканскай камісіі па рэгістрацыі (перарэгістрацыі) грамадзкіх аб’яднаньняў, практычная неабходнасьць у існаваньні якой адпала. Такім чынам, функцыі дзяржаўнай рэгістрацыі грамадзкіх аб’яднаньняў ускладваюцца выключна на органы юстыцыі.

     Як заўсёды, праект новага закона абапіраецца на міжнародныя праўныя нормы ў гэтай галіне, забавязаньні, прынятыя Рэспублікай Беларусь у межах Міжнароднай арганізаці працы, аднастайную практыку функцыянаваньня прафсаюзаў у краіне. Можа на гэты раз Камітэт па свабодах асацыяцыяў ня будзе рабіць заключэньняў па нашым заканадаўстве? У кантэксьце таго, што разуменьне міжнародных нормаў лягічна мусіць быць аднолькавым.

     Прэс-служба Прэзыдэнта падкрэсьліла, што дакумэнты істотна спрошчваюць і дэбюракратызуюць працэс стварэньня і дзейнасьці ў Беларусі аднаго з наймацнейшых апірышчаў дзяржавы – прафсаюзаў. Пытаньне для роздуму: усё ж такі чыім апірышчам мусяць быць прафзьвязы?

 БелТА