У Грузіі завяршыўся падлік галасоў на мясцовых выбарах. У іншых варунках гэтая падзея не мела б значнага грамадскага рэзанансу, аднак чарговае і надзвычай рэзкае пагаршэнне расійска-грузінскіх стасункаў ператварыла яе ў іспыт даверу да палітычнага курсу прэзідэнта Саакашвілі.

Па дадзеных Цэнтральнай Выбарчай Камісіі Грузіі, партыя дзейснага прэзідэнта "Нацыянальны Рух" атрымала пераканаўчую перамогу. У Тбілісі, відавочна, найбольш значным электаральным рэгіёне, за "Рух" аддалі свае галасы 66.42% выбарцаў. Кансерватыўны блок "Давіташвілі, Хідаішэлі, Бердзанішвілі" набраў 12%, на трэцім месцы апынуліся грузінскія лейбарысты - 10,67%.

Вынікі галасавання супалі з дадзенымі экзіт-пулаў, якія прадказвалі бясспрэчную перамогу партыі ўлады. Нягледзячы на гэта, глава Цэнтральнай Выбарчай Камісіі Грузіі Гурам Халагашвілі пацвердзіў наяўнасць парушэнняў у шасці акругах і не выключыў магчымасць перавыбараў у адной з іх - Абаша.

Прадстаўнікі партыі Лейбарыстаў заклікалі міжнародную супольнасць не вызаваць дадзеныя ЦВК, аднак прадстаўнікі місіі АБСЕ і ЕЗ, якія ажыццяўлялі маніторынг выбараў, ужо афіцыйна абвесцілі адсутнасць якіх-кольвек сур'ёзных парушэнняў.