2-га кастрычніка Рада Бяспекі ААН ажыццявіла чацьвертае рэйтынгавае галасаванне па кандыдатурах прэтэндэнтаў на пасаду наступнага Генеральнага сакратара ААН. Як і ў папярэднія разы, у гэтым туры перамог міністр замежных справаў і гандлю Рэспублікі Карэя Пан Гі Мун. Падчас ананімнага галасавання за ягоную кандыдатуру выказаліся 14 з 15 чальцоў Рады Бяспекі. Пры гэтым ніводны заўсёдны ўдзельнік Рады не прагаласаваў супраць.

Пакуль у спісе кандыдатаў на пасаду застаюцца прэзідэнтка Латвіі Вайра Віке-Фрэйберга, заўсёдны прадстаўнік Ярданіі пры ААН прынц Зэйд Раад Зэйд аль-Хусэйн, былі заступнік прэм’ер-міністра Таіланда Сурак’ярт Сатхыратхай, а таксама былы міністр фінансаў Аўганістана Ашраф Гані.

На галасаванні ў панядзелак Вайра Віке-Фрэйберга атрымала трэцяе месца: яе падтрымалі 5 чальцоў Рады. На другой пазыцыі ізноў апынуўся заступнік кіраўніка ААН па пытаннях грамадскай інфармацыі Шашы Тхарур з Індыі. Ён атрымаў 10 галасоў “за” і 3 “супраць”. Аднак пасля галасавання Шашы Тхарур заявіў, што здымае сваю кандыдатуру, бо ўпэўнены ў перамозе прадстаўніка Карэі.

Паўнамоцтвы Кофі Аннана, які з’яўляецца сёмым Генеральным сакратаром і займае гэтую пасаду з 1997 года, сканчваюцца 31 снежня. Паводле Статута ААН, Генеральны Сакратар ёсць галоўнай адміністратыўнай службовай асобай Арганізацыі. Ён прызначаецца Генеральнай Асамблеяй на падставе рэкамендацыі Рады Бяспекі.

Канчатковае галасаванне Рады па кандыдатурах, хутчэй за ўсё, адбудзецца 9-га кастрычніка.