Зачыненая праз карыкатурны скандал ў лютым бягучага году валагодзкая газэта “Наш регион” атрымала пасьведчаньне аб дзяржаўнай рэгістрацыі. Аб гэтым паведаміла былы галоўная рэдактарка тыднёвіка Ганна Смірнова.
Нагадаем, што 15 лютага 2006 года газэта “Наш регион” апублікавала матэрыял “Карыкатурная вайна: меркаваньні”, у якім былі перадрукаваныя некалькі данскіх карыкатураў, першапачатковыя публікацыі якіх у заходнеэўрапейскай прэсе выклікалі акцыі пратэсту мусульманаў усяго сьвету. Некалькі дзён пасьля пракуратура Валагодзкай вобласьці ўзбудзіла крымінальную справу па артыкуле 282 Крымінальнага Кодэкса РФ (“узбуджэньне нацыянальнай, расавай ці рэлігійнай варожасьці асобай з выкарыстаньнем службовага стану”). 20 лютага ўласьнік газэты Міхаіл Смірноў зачыніў яе.
У красавіку гарадзкі суд Волагды прызнаў Смірнову вінаватай і прыгаварыў яе да штрафу ў памеры 100 тысячаў рублёў. Адвакаты журналісткі падалі касацыйную скаргу ў вышэйшую інстанцыю. Валагодзкі абласны суд вызваліў Смірнову ад пакараньня. Але яна ўсё адно лічыцца вінаватай у распальваньні рэлігійнай варожасьці.
На пачатку лютага 2006 года валгаградзкая і валагодзкая газэты апублікавалі карыкатуры на рэлігійныя тэмы. Малюнкі зьявіліся ў распал “карыкатурнага скандалу” вакол публікацыі ў данскай газэце сатырычнага комікса на прарока Мухамеда. Нягледзячы на тое, што толькі валагодзкая газэта "Наш регион" перадрукавала данскія малюнкі, аналягічныя публікацыі якіх выклікалі масавыя акцыі пратэста па ўсім сьвеце, а валгаградзкая газэта "Городские вести" апублікавала шарж уласнага мастака, была спыненая дзейнасьць абодвух выданьняў. Алтайскае інформагенцтва "Банкфакс" карыкатураў на рэлігійныя тэмы не публікавала, аднак у сакавіку ўпраўленьне Росохранкультуры РФ па Сыбірскай фэдэральным акрузе зьвярнулася ў суд Барнаула з патрабаваньнем закрыць СМІ. Разьюшанасьць чыноўнікаў выклікаў камэнтар на Інтэрнэт-форуме выданьня, дзе чытач разважаў аб падвоеных стандартах, якіх прытрымліваюцца ўлады, якія закрываюць замяшаныя ў карыкатурным скандале выданьні. Акрамя таго, папярэджаньне было вынесенае інтэрнэт-выданьню "Газета.Ru". Дзеяньні расейскіх чыноўнікаў мелі шырокі рэзананс па ўсёй краіне.
www.lenta.ru
