У сераду палата прадстаўнікоў Кангрэсу ЗША 253 галасамі супраць 168 прыняла законапраект аб стварэньні вайсковых камісіяў для суду над тэрарыстамі. Адміністрацыя Буша лічыць яго “важным інструмэнтам у барацьбе з тэрарызмам”.

Законапраект прадугледжвае стварэньне ваенных камісіяў, якія будуць судзіць найбольш адыёзных тэрарыстаў. Таксама супраць іх дазволена прымяняць так званыя “жорсткія” мэтады дазнаньня. А супрацоўнікі спэцслужбаў, якія будуць праводзіць такія допыты, вызваляюцца ад адказнасьці за свае дзеяньні.

Дакумэнт быў накіраваны на Капіталійскі холм адначасова з прызнаньнем Белым домам існаваньня сакрэтных турмаў ЦДУ і пераводу 14 кіраўнікоў групоўкі “Аль-Каіда” у лягер на базе ПМС ЗША ў Гуантанамо на Кубе.

Аднак падрыхтаваны адміністрацыяй дакумэнт атрымаў нэгатыўную рэакцыю ня толькі з боку прадстаўнікоў апазыцыйнай Дэмакратычнай партыі, але і з боку Рэспубліканскай партыі, якая знаходзіцца цяпер пры ўладзе. Асноўныя праблемныя моманты датычыліся спробаў даць новыя тлумачэньні зьместу Жэнэўскай канвэнцыі.

Адміністрацыя Буша не пайшла на канфлікт і пачала перамовы з чальцамі кангрэсу. Такім чынам быў выпрацаваны кампрамісны варыянт. І хаця гэты дакумэнт прадугледжвае больш шырокія (чым папярэднія) правы для замежных вязьняў, ён у той жа час надае выканаўчай уладзе шырокія паўнамоцтвы ў абыходжаньні з палоннымі.

Такім чынам цяпер, калі законапраект атрымаў адабрэньне палаты прадстаўнікоў, аналягічнае галасаваньне мусіць прайсьці ў Сэнаце.

Падсумуем: кангрэсмэны прагаласавалі за катаваньні. Будзем сачыць за далейшым разьвіцьцём падзей ва ўлоньні амэрыканскай дэмакратыі.

www.vesti.ru