ЦВК РФ адмовілася выносіць на агульнарасейскі рэфэрэндум пытаньне аб трэцім прэзыдэнцкім тэрміне. Пытаньне, якое прапаноўвалася для вынясеньня на рэфэрэндум, гучыць наступным чынам: “Ці згодныя Вы, што адная і тая ж асоба ня можа займаць пасаду прэзыдэнта РФ болей двух разоў запар?”.

Нагадаем, што прапанова аб правядзеньні рэферэндума была ўнесеная ЦВК Паўночнай Асеціі-Аланіі. Як зазначаецца ў заключэньні ЦВК РФ, тое, што адная і тая ж асоба ня можа займаць пасаду прэзыдэнта болей двух разоў запар, прадугледжваецца часткай 3 артыкула 81 Канстытуцыі РФ. “Таму станоўчы адказ на пытаньне, якое прапанавалася вынесьці на рэфэрэндум РФ, уяўляе сабой падцьверджаньне існай канстытуцыйнай нормы” – адзначае ЦВК. Па меркаваньні камісіі, канстытуцыйныя нормы ня маюць неабходнасьці ў дадатковым падцьверджаньні, якое выражаецца, ў тым ліку, шляхам рэфэрэндуму.

У зьвязку з вышэйазначаным, камісія адзначыла, што прапанаванае пытаньне ня можа быць вынесенае на рэфэрэндум. Як паведаміла падчас выступленьня чалец ЦВК РФ Людміла Кулясава, згодна з фэдэральным канстытуцыйным законам “Аб рэфэрэндуме РФ”, рашэньне, прынятае на рэфэрэндуме, прызнаецца ў тым выпадку, калі “за” пытаньне рэфэрэндуму прагаласавала больш паловы яго ўдзельнікаў, пры гэтым, калі абсалютная большасьць яго ўдзельнікаў прагаласуе супраць пытаньня рэфэрэндуму, рашэньне застаецца непрынятым. Такім чынам, якое б рашэньне ні было прынятае на прапанаваным рэфэрэндуме, яно не прывядзе да праўных вынікаў.

Раней мы ўжо пісалі пра тое, што Пуцін зазначаў, што Канстытуцыя РФ ня будзе зьмененая, каб даць яму магчымасьць балятавацца на трэці тэрмін. Прэзыдэнт сказаў, што найвялікшым дасягненьнем апошніх гадоў у Расеі ёсьць стабільнасьць. “Ня можа быць стабільнай сытуацыя ў краіне, калі мы дэстабілізуем Падставовы закон дзяржавы”, - падкрэсьліў У. Пуцін. Атрымліваецца, што ЦВК РФ выказаў “Так” стабільнасьці і “Не” рэфэрэндуму.

www.afn.by