Стамбульскі суд апраўдаў турэцкую пісьменьніцу Эліф Шафак, якая апублікавала вясной 2006 года раман “Пазашлюбны сын Стамбула”, дзеяньне якога адбываецца ў гады рэзьні армянаў у Атаманскай імпэрыі.

У чацьвер мясцовы суд апраўдаў папулярную турэцкую пісьменьніцу. Ён не знайшоў парушэньня артыкула 301 Крымінальнага Кодэкса Турэччыны ў новай кнізе пісьменьніцы, якая выйшла ў сьвет у красавіку 2006 года. Эліф Шафак пагражалі 3 гады турмы за ўпамін ў мастацкім творы факта генацыду армянскага народа. У Турэччыне гэтая тэма забароненая. Анкара адмаўляецца прызнаць генацыдам падзеі 1915-1917 гг., калі з тэрыторыі Асманскай Імпэрыі былі гвалтоўна высяленыя ці забітыя больш за мільён армянаў. У Турэччыне гэта тлумачыцца рэаліямі вайсковага часу – турэцкія ўлады сцьвярджаюць, што ва ўсім вінаватая Першая Сусьветная вайна.

Пісьменьніца на паседжаньні не прысутнічала. Аглядальнікі называлі суд над Шафак спраўджаньнем свабоды слова для Турэччыны, якая імкнецца ўступіць у Эўразьвяз.

Судовы працэс быў распачаты 21 верасьня. Генэральны пракурор Стамбула зьвінаваціў пісьменьніцу ў парушэньні артыкула 301 Крымінальнага Кодэкса Турцыі – абразе нацыянальнай годнасьці туркаў. Гэты артыкул узяў сілу летась ў чэрвені і адразу справакаваў хвалю крытыкі. У абразе нацыянальнай годнасьці былі абвінавачыныя блізу 60 турэцкіх пісьменьнікаў і журналістаў. “Найвялікшай праблемай артыкула 301 ёсьць ня тое, што ў адпаведнасьці зь ім сажаюць за краты, але тое, што ён прымушае нас маўчаць”, - адзначыла Эліф Шафак. Крытыкі 301 артыкула ў Турэччыне і ў сьвеце кажуць, што ён цісьне свабоду слова, а гэта можа перашкодзіць краіне ўступіць у Эўрапейскі Зьвяз. Неабходна адзначыць, што Турэччына ўпершыню высоўвала абвінавачваньне па гэтым артыкуле за мастацкі твор.

Нагадаем, што праблема непрызнаньня генацыду армянаў зьяўляецца спрэчным пунктам перамоваў паміж Турэччынай і Эўразьвязам з пытаньня ўступленьня краіны ў гэты зьвяз.