З ініцыятывай аб правядзеньні рэфэрэндума за трэці срок для Пуціна выступіў заканадаўчы орган Паўночнай Асеціі. Кіраўнік ЦВК РФ Вешнякоў паведаміў, што дакумэнты аб стварэньні ініцыятыўнай групы па падрыхтоўцы рэфэрэндума паступілі ў ЦВК 18 верасьня. У адпаведнасьці з законам, ЦВК мае 10 дзён, каб вырашыць, наколькі пытаньне, якое плянуецца выносіць на рэфэрэндум, адпавядае патрабаваньням фэдэральнага закона. ЦВК ужо пачаў аналізаваць прадстаўленыя дакумэнты і вынясе рашэньне не пазьней 27 верасьня.

Разам з тым А.Вешнякоў пацьвердзіў сваю папярэднюю пазыцыю, што нават у выпаду станоўчага рашэньня ЦВК ініцыятары рэфэрэндума ня змогуць укласьціся ў тэрмін, які б не парушаў заканадаўства: правядзеньне рэфэрэндумаў забароненае за год да парлямэнцкіх выбараў. Тым ня менш, ЦВК забавязаны дасьледаваць пытаньне і вынесьці рашэньне, “наколькі ўвогуле магчымы такі рэфэрэндум”.

Тым часам у аўторак стала вядома, што дзяржаўная Дума РФ можа ўжо ў кастрычніку-лістападзе разгледзець заканадаўчую ініцыятыву чачэнскіх парлямэнтароў аб зьмяненьні Канстытуцыі РФ з мэтай ліквідацыі абмежаваньняў прэзыдэнту РФ магчымасьці быць абраным на трэці тэрмін. Рада Думы накіравала законапраект чачэнскіх дэпутатаў для разгляду ў фракцыі і камітэты; цягам месяца яны мусяць азначыцца па канцэпцыі гэтага праекта закона.

Парлямэнт Чачэніі напрыканцы ліпеня прыняў пастанову аб унясеньні ў Дзярждуму РФ у парадку заканадаўчай ініцыятывы праект фэдэральнага закона “Аб папраўке да Канстытуцыі РФ па зьмяненьні тэрміна паўнамоцтваў прэзыдэнта РФ”, што дазволіла б прэзыдэнту РФ У.Пуціну балятавацца на пост прэзыдэнта ў трэці раз запар у 2008 годзе. Для ўнясеньня такой зьмены ў Канстытуцыю неабходна атрымаць падтрымку дзьвюх трацінаў складу Дзярждумы, то бок 300 галасоў і, акрамя таго, закон мусіць быць падтрыманы трыма чвэрцямі чальцоў Рады Фэдэрацыі і ня менш чым дзьвюма трацінамі ад агульнай лічбы Заканадаўчых Сходаў суб’ектаў РФ.

Нагадаем, што яшчэ ў ліпені 2006 года ў інтэрвію францускаму тэлеканалу TF-1 У.Пуцін зноў пацьвердзіў, што Канстытуцыя РФ ня будзе зьмененая, каб даць яму магчымасьць балятавацца на трэці тэрмін. Прэзыдэнт сказаў, што найвялікшым дасягненьнем апошніх гадоў у Расеі ёсьць стабільнасьць. “Ня можа быць стабільнай сытуацыя ў краіне, калі мы дэстабілізуем Падставовы закон дзяржавы”, - падкрэсьліў У.Пуцін.

Паводле: www.newsru.com