З нагоды 5-цігодзя тэрарыстычных атакаў 11 верасня 2001 у Злучаных Штатах Амерыкі, Еўрапейскі Звяз узгадаў шматлікіх ахвяраў, выказаў свае спачуванні сваякам і сябрам тых, хто загінуў, і ізноў асудзіў любыя формы тэрарызму.

“Жудасныя тэракты 11 верасня яскрава прадэманстравалі, што тэрарызм з’яўляецца пагрозай для ўсіх дзяржаваў свету і для ўсіх народаў. Тэрарызм ёсць пагрозай бяспекі, каштоўнасцям дэмакратычных грамадстваў, правам і свабодам чалавека, асабліва з улікам таго, што ёсць скіраваным супраць невінаватых асобаў. Тэрарыстычныя дзеянні нельга абгрунтаваць ніякімі чыннікамі.” Менавіта такімі словамі пачынаецца дакумент.

Паводле Дэкларацыі, барацьба з тэрарызмам ёсць прыярытэтнай задачай для Еўрапейскага Саюза. ЕС вельмі цэніць супрацоўніцтва са Злучанымі Штатамі Амерыкі і іншымі дзяржавамі ў гэтым накірунку і падкрэслівае, што ўсе дзеянні, якія прымаюцца дзеля папярэджання і барацьбы з тэрарызмам, павінны адпавядаць нормам міжнароднага права, асабліва міжнароднага гуманітарнага права, права ўцекачоў і права правоў чалавека. У звязку з гэтым, Еўрапейскі Звяз ухваліў прыняцце Генеральнай Асамблеяй Аб’яднаных Нацыяў 8-га верасня 2006 года першай Глабальнай Стратэгіі па Барацьбе з Тэрарызмам  і адзначыў, што будзе працягваць свае абавязкі па ўдзелу ў стварэнні больш бяспечнага свету.

Краіны-чальцы ЕС ізноў падкэсліваюць, што паўнавартасная кааперацыя міжнароднай супольнасці мела вынікам значныя поспехі ў барацьбе з тэрарызмам і шмат патэнцыйных тэрарыстычных атакаў былі папярэджаны, але доўгатэрміновы ўстойлівы поспех у барацьбе з тэрарызмам можа быць дасягнуты толькі, калі міжнародная супольнасць вырашыць праблемы, што правакуюць распаўсюджванне тэрарызму.