Дзеля стварэньня дадатковай крыніцы фінансаваньня разьвіцьця турысцкай інфраструктуры дзяржаўных прыродаахоўных установаў, падпарадкаваных Управе справамі Прэзыдэнта Рэспублікі Беларусь 6 ліпеня 2006 году быў падпісаны Ўказ № 429 “Аб перадачы рэспубліканскага ўнітарнага прадпрыемства “Беларускія лятарэі” у падпарадкаваньне Ўправе справамі Прэзыдэнта Рэспублікі Беларусь”.

У адпаведнасьці з падпісаным Указам № 429 рэспубліканскае ўнітарнае прадпрыемства “Беларускія лятарэі” перадаецца ў падпарадкаваньне Ўправе справамі Прэзыдэнта. Акрамя таго, у такі спосаб Управа справамі Прэзыдэнта атрымлівае правы ды абавязкі заснавальніка латарэяў.

Атрыманы прыбытак ад лятарэяў мусіць накіроўвацца на разьвіцьцё турысцкай інфраструктуры дзяржаўных прыродаахоўных установаў, падпарадкаваных Управе справамі Прэзыдэнта. Указ набывае моц з дню афіцыйнага апублікаваньня.

Варта дадаць, што паводле ацэнкі “БДГ” заробак “УП “Беларускія лятарэі” за 10 месяцаў мінулага году склаў каля 22 млрд рублёў. Аналягічную суму склалі прызавыя сплаты.