Францыя ды Габон ёсьць першымі краінамі, якія зь 1 ліпеня 2007 года ўвялі на сваёй тэрыторыі дадатковы падатак на авіябілеты дзеля атрыманьня сродкаў на фінансаваньне праектаў па аказаньню дапамогі эканамічна адсталым краінам.

У Францыі памер новага збору складае ад 1 да 40 эўра ў залежнасьці ад даўжыні палёту ды клясы авіябілету. У Габоне падатак на праязны дакумэнт для авіяпасажыраў складае ад 1 да 4 эўра.

Францускія ўлады плянуюць атрымліваць да 200 мільёнаў эўра штогод ад авіяпадатку. 90% атрыманых сродкаў будуць выдаткоўвацца на набыцьцё лекаў для хворых на СНІД у эканамічна адсталых краінах. Астатнія 10% будуць пералічвацца на рахунак створанай Вялікай Брытаніяй міжнароднай фінансавай фундацыі падтрымкі эканамічнага разьвіцьця ды аховы здароўя ў неразьвітых краінах.

Дадатковы падатак на авіябілеты ў хуткім часе плянуюць увесьці Вялікая Брытанія, Люксэмбург, Нарвэгія, Кіпр, Ярданія, Бразылія, Нікарагуа, Чылі, Маўрытанія, Дэмакратычная рэспубліка Конга ды Бераг Слановае Косьці.