У расейскую Дзяржаўную Думу ўнесены законапраект, якім уносяцца зьмяненьні і дапаўненьні ў законы Расійскай Фэдэрацыі “Аб рэкляме” ды “Аб сродках масавай інфармацыі”. У адпаведнасьці з законапраектам плянуецца ўвядзеньне абмежаваньняў на рэкляму сэксуальных паслугаў ды эратычных праграмаў тэлебачаньня.

Законапраект абмяжоўвае рэкляму сэксуальных паслугаў ажно да эратычных карцінак для мабільных тэлефонаў, эратычных SMS-чатаў, а таксама сэксу па тэлефоне на моладзевых тэлеканалах. Распаўсюд такой рэклямы будзе дазволены выключна на тэлеканалах з кадаваным сыгналам, якія як правіла платныя, а таксама ў друкаваных СМІ, якія спэцыялізуюцца на матэрыялах эратычнага характару.

Законапраект таксама абмяжоўваюцца трансьляцыі телепраграмаў эратычнага характару ў адкрытым этэры. Такія праграмы, у адпаведнасьці з унесенымі прапановамі, будуць транслявацца толькі на каналах, доступ да якіх ажыцьцяўляецца выключна на платнай падставе пры выкарыстаньні дэкадуючых тэхнічных сродкаў.