Дзеля падвышэньня эфэктыўнасьці выкарыстаньня сродкаў на рэкляму, маркетынгавыя, кансультацыйныя ды інфармацыйныя паслугі, прадстаўнічыя мэты, падрыхтоўкі кадраў 15 чэрвеня 2006 года Прэзыдэнт Рэспублікі Беларусь быў падпісаў Указ № 398 “Аб зацьвярджэньні нормаў выдаткаў на рэкляму, маркетынгавыя, кансультацыйныя ды інфармацыйныя паслугі, прадстаўнічыя мэты, падрыхтоўку кадраў”. Нарматыўна-праўны акт вызначае межы, у якіх памянёныя нормы могуць быць уключаны ў склад выдаткаў, якія ўлічваюцца пры спагнаньні падаткаў.

Указ Прэзыдэнта № 398 вызначае агульныя нормы расходаў для юрыдычных асобаў і індывідуальных прадпрымальнікаў на прадстаўнічыя мэты што да прыёму і абслугоўваньня замежных дэлегацыяў і пэўных асобаў (у тым ліку й што да сплаты гатэляў, харчаваньня, культурнага ды побытавага абслугоўваньня, паслугаў перакладніка й транспартных паслугаў), арганізацыі правядзеньня сходаў, канфэрэнцыяў, сэмінараў, калегіяў, нарадаў – у памеры да 0,2% выдаткаў на аплату працы работнікаў гэтых арганізацыяў і індывідуальных прадпрымальнікаў за справаздачны пэрыяд. На падрыхтоўку кадраў паводле дамоваў, заключаных с установамі, якія забясьпечваюць атрыманьне вышэйшай, сярэдне-спэцыяльнай і прафэсійна-тэхнічнай адукацыі нормы расходаў мусяць складаць ня больш за 2% выдаткаў на аплату працы работнікаў гэтых арганізацыяў і індывідуальных прадпрымальнікаў за справаздачны пэрыяд, калі іншае не вызначана Прэзыдэнтам Рэспублікі Беларусь.

Дадаткова для арганізацыяў і індывідуальных прадпрымальнікаў, якія ажыцьцяўляюць турыстычную дзейнасьць, дзейнасьць у арганізацыі ды правядзеньні тэатральна-відовішчных мерапрыемстваў, замацаваны падвышальны нарматыў выдаткаў на рэкляму, маркетынгавыя, інфармацыйныя й кансультацыйныя паслугі.

Арганізацыям і індывідуальным прадпрымальнікам, асноўным відам дзейнасьці якіх ёсьць арганізацыя выставаў, кірмашоў, а таксама тых, якія разьмяшчаюць рэкляму праз дзяржаўныя тэлерадыёвяшчальныя арганізацыі й з доляй дзяржаўнай уласнасьці ня менш за 51%, надаецца права на ўключэньне ў выдаткі фактычна ўчыненых выдаткаў на рэкляму, а дзяржаўным тэлерадыёвяшчальным арганізацыям – фактычна ўчыненых выдаткаў на маркетынгавыя, інфармацыйныя й кансультацыйныя паслугі.

Вылічэньне нормаў выдаткаў юрыдычнымі асобамі ды індывідуальнымі прадпрымальнікамі будзе ажыцьцяўляцца ў адпаведнасьці з заканадаўствам Рэспублікі Беларусь аб бугальтарскім уліку ад утаргоўкі, атрыманай ад рэалізацыі тавараў (працаў, паслугаў), ці то валавога прыбытку за справаздачны пэрыяд.

Указ Прэзыдэнта Рэспублікі Беларусь № 398 ад 15 чэрвеня 2006 году “Аб зацьвярджэньні нормаў выдаткаў на рэкляму, маркетынгавыя, кансультацыйныя ды інфармацыйныя паслугі, прадстаўнічыя мэты, падрыхтоўку кадраў” набывае моц ад 1 чэрвеня 2006 года.