Дзяржаўная Дума Расеі прыняла ў трэцім чытаньні Закон, у адпаведнасьці зь якім дэпутатам забараняецца зьмяняць сваю партыйную прыналежнасьць. Пры неабходным кворуме ў 226 галасоў за прыняцьце закону прагаласавалі 378 дэпутатаў, а супраць – 57.

Прыняты дакумэнт устанавіў, што ў фракцыю ўваходзяць усе дэпутаты, якія выбраныя ў складзе фэдэральнага сьпісу палітычнай партыі, што брала ўдзел у выбарах. Дэпутат Дзяржаўнай Думы, які ўваходзіць у склад фракцыі, можа быць чальцом толькі той палітычнай партыі, у складзе фэдэральнага сьпісу якой ён быў абраны. Парушэньне памянёнае нормы прыводзіць да датэрміновага спыненьня паўнамоцтваў дэпутату. Захаваньне дэпутацкіх паўнамоцтваў магчыма толькі тады, калі апошні застанецца беспартыйным чальцом фракцыі.

Аналягічнае правіла прыналежнасьці да партыі распаўсюджваецца й на заканадаўчыя ворганы суб’ектаў Расеі. Дэпутат, які абраны ад партыі, што ўваходзіць у фракцыю, ня мае права на выхад зь яе складу альбо на пераход у іншае дэпутацкае аб’яднаньне, а дэпутат-аднамандатнік можа быць альбо беспартыйным, альбо чальцом той партыі, якая стварыла фракцыю.