Найвышэйшы суд Злучаных Штатаў Амэрыкі дазволіў паліцыянтам пры наяўнасьці ордэру ўваходзіць у дамы, кватэры й іншыя памяшканьні бяз груку ды прадстаўленьня.

Такое рашэньне Найвышэйшы суд Злучаных Штатаў Амэрыкі прыняў па справе ад 1998 году ў дачыненьні да Букэра Гадсана (Booker Hudson), у якога ў доме паліцыянты знайшлі наркотыкі ды зброю. Адвакаты Букэра Гадсана зьвярнуліся ў Найвышэйшы суд краіны з скаргай аб неправамернасьці дзеяньняў паліцыянтаў, бо тыя, перад тым, як увайсьці ў дом дзеля ператрусу, не паведамілі пра сваё зьяўленьне каля дзьвярэй (не пагрукалі й не прадставіліся як трэба). Такім чынам, доказы былі атрыманы неналежным чынам, т.б. яны ёсьць недапушчальнымі.

Пры вынясеньні рашэньня на карысьць паліцыі судзьдзі сыходзілі з таго, што ня мае значэньне, ці прадставіліся паліцыянты і ці пагрукалі яны ў дзьверы: усё роўна быў ордэр на ператрус і, як вынік, яны ўсё роўна знайшлі б наркотыкі ды зброю ў доме Гадсана. Рашэньне было прынятае зь перавагай у адзін голас: пяць супраць чатырох.

Такім чынам, рашэньнем Найвышэйшага суду Злучаных Штатаў Амэрыкі паліцыянтам у краіне было дазволена ўваходзіць у памяшканьне бяз груку ды прадстаўленьня пры наяўнасьці ордэру.