30 траўня 2006 году ў Данецку на паседжаньні адміністрацыйна-гаспадарчага актыву Прэзыдэнт Украіны Віктар Юшчанка заявіў аб гарантаваньні дзяржавай поўнае падтрымкі ўсіх моваў ва Ўкраіне.
Апошнім часам некалькі гарадзкіх ды абласных радаў на паўдзённым усходзе Ўкраіны прынялі пастановы аб наданьні расейскай мове на іх тэрыторыі статусу рэгіянальнай. Прэзыдэнт Украіны назваў гэтыя рашэньні незаконнымі, бо пытаньне аб статусе той ці іншай мовы вызначаецца толькі на заканадаўчым узроўні і не належыць да кампэтэнцыі ворганаў мясцовага самакіраваньня. Дзеля зьмяненьня статусу мовы павінна быць адпаведная ініцыятыва Прэзыдэнта ці ня менш за дзьве траціны канстытуцыйнага складу Вярхоўнай Рады.
Зыходзячы зь незаконнасьці дзеяньняў ворганаў мясцовага самакіраваньня на паўдзённым усходзе Ўкраіны Прэзыдэнт даў даручэньне ворганам пракуратуры прыняць захады што да іх адмены.
