2 чэрвеня ў Менску адбыўся чарговы справаздачна-выбарчы зьезд грамадзкага аб'яднаньня "Беларуская асацыяцыя журналістаў". Дэлегаты абмеркавалі сытуацыю, у якой апынуліся недзяржаўныя СМІ, пераабралі кіраўніцтва арганізацыі, а таксама прынялі шэраг важных дакумэнтаў, у тым ліку зварот да журналісцкай супольнасьці краіны.

На зьзьдзе прысутнічалі 79 дэлегатаў з 82 вылучаных. Зьезд заслухаў справаздачы кіраўніцтва БАЖ, кантрольна-рэвізійнай камісіі, камісіі па этыцы, а таксама даў магчымасьць выказацца прысутным. Па выніках працы былі прынятыя некалькі дакумэнтаў. Сярод іх - зварот да журналісцкай супольнасьці "Журналістыка - прафесія сумленных і адказных" (яго адразу назвалі Маніфэстам сумленьня), у якім дэлегаты заклікалі калегаў "усьвядоміць усю глыбіню адказнасьці, якую журналісты нясуць перад грамадзтвам", і "абвясьцілі сваю адданасьць прынцыпам прафэсійнай журналістыкі і журналісцкай этыкі". Акрамя гэтага, дэлегаты большасьцю галасоў вырашылі рэкамендаваць сябрам БАЖ у якасьці "высокага арыентыру прафэсійных паводзінаў" Кодэкс журналісцкай этыкі, распрацаваны яшчэ да мінулага зьезду.

На зьезьдзе было шмат выступоўцаў ад рэгіянальных і моладзевых структураў. Дэлегаты заслухалі справаздачу юрыстаў Цэнтру праўнай дапамогі СМІ пры БАЖ, аднаго з прыярытэтных кірункаў дзейнасьці арганізацыі.

Шляхам адкрытага галасаваньня Зьезд абраў новыя кіроўныя ворганы арганізацыі. Дэлегаты адзінагалосна падтрымалі прапанову аднаго з дэлегатаў і пераабралі на пасаду кіраўніка арганізацыі Жанну Літвіну. Паўнамоцтвы двух намесьнікаў старшыні БАЖ - Андрэя Бастунца і Тацяны Мельнічук - былі працягнутыя; таксама былі абраныя на пасаду намеснікаў Аляксандр Старыкевіч і Аліна Суравец. Дэлегаты прынялі зьмены ў Статут.

Нагадаем, што ГА “Беларуская асацыяцыя журналістаў” дзейнічае з 1995 г. З 1997 г. БАЖ ёсьць асацыяваным сябрам Міжнароднай фэдэрацыі журналістаў. У чэрвені 2003 г. Міжнародная асацыяцыя газэтаў узнагародзіла БАЖ "Залатым пяром Свабоды-2003". У сьнежні 2004 г. арганізацыя атрымала ад Эўрапарлямэнту прэмію імя А. Сахарава “За свабоду думкі”.

Асноўнымі кірункамі дзейнасьці БАЖ ёсьць:

-         юрыдычная падтрымка сябраў арганізацыі;

-         падвышэньне кваліфікацыі супрацоўнікаў СМІ;

-         маніторынг сытуацыі ў галіне СМІ;

-         выданьне часопіса «Абажур»;

-         кампаніі салідарнасьці;

-         супраца зь міжнароднымі журналісцкімі арганізацыямі.