1 чэрвеня набыло юрыдычную моц рашэнне Урада Беларусі аб зацверджанні новай  Інструкцыі аб парадку прымусовай эвакуацыі транспартных сродкаў, у адпаведнасці з пастановай Савета Міністраў Рэспублікі Беларусь ад 26 траўня 2006 года № 666. Інструкцыя ўсталёўвае адзіны для прадстаўнікоў Дзяржаўнай аўтаінспекцыі МУС парадак прымусовай эвакуацыі транспартных сродкаў, якія ствараюць перашкоды для дарожнага руху ці пагражаюць бяспекі грамадзянаў.

Прымусовая эвакуацыя паводле Інструкцыі ёсць прымусовае перамяшчэнне транспартнага сродку на ахоўную стаянку ў выпадку парушэння кіроўцам правілаў прыпынку і стаянкі транспартнага сродку. Пад выпадкамі парушэння правілаў прыпынку і стаянкі разумеецца парушэнне артыкулаў 143 і 145 Правілаў дарожнага руху, якія былі зацверджаныя Указам  Прэзідэнта Рэспублікі Беларусь ад 28 лістапада 2005 году №551, і пры адсутнасці кіроўцы ў транспартным сродку альбо ў непасрэднай блізкасці ад яго. Пры наяўнасці ў транспартным сродку аднаго ці некалькіх пасажыраў эвакуацыя забараняецца.

Інструкцыя рэгламентуе таксама парадак афармлення пратаколу па факту эвакуацыі, агляду транспартнага сродку, які робіць інспектар ДАІ, на прадмет усталявання бачных дэфектаў і пашкоджанняў, якія пазначаюцца ў пратаколе.

Акрамя таго, дакумент замацоўвае парадак інфармавання ўласніка аб дзеяннях у дачыненні транспартнага сродку. Гэта павіннна рабіць аператыўна-дзяжурная служба тэрытарыяльнага органа ўнутраных справаў. Артыкул 10 Інструкцыі замацоўвае абавязак вяртання транспартнага сродку, які знаходзіцца на захаванні, па першым патрабаванні ўласніка, але пры гэтым ён павінен прадставіць пэўны шэраг дакументаў: пасведчанне аб рэгістрацыі транспартнага сродку, пасведчанне кіроўцы і талон. Калі нейкі дакумент адсутнічае, аўтамабіль не вяртаецца.

За пашкоджанні, якія былі нанесеныя транспартнаму сродку ў выніку яго прымусовай эвакуацыі ці падчас яго знаходжання на ахоўнай стаянцы, нясе адказнасць юрыдычная асоба, прадстаўнікі якой ажыццяўлялі эвакуацыю  і захаванне.

Выдаткі, звязаныя з прымусовай эвакуацыяй на ахоўную стаянку, пакрываюцца асобай, якая здзейсніла адміністрацыйнае правапарушэнне. Калі дадзеная асоба адмаўляецца пакрываць выдаткі, яны спаганяюцца ў судовым парадку.