Дзяржаўная дума Расеі прыняла 26 траўня рашэньне даслаць запыт ва ўрад пра магчымыя захады па “вяртаньні” паўвыспы Крым у склад Расеі. Адпаведнае пратакольнае даручэньне думскім камітэтам у міжнародных справах і справах СНД падтрымалі на гэтым тыдні дэпутаты Дзярждумы.
У даручэньні адзначаецца, што ў 2007 годзе сканчваецца двухбаковая дамова з Украінай аб прызнаньні яе Расеяй у існых межах. У зьвязку з гэтым, адзначаюць дэпутаты, да 30 лістапада 2006 г. неабходна заявіць аб непрацягненьні дадзенай дамовы і вяртаньні Крыму ў склад РФ у адпаведнасьці з Кучук-Кайнарджыйскай дамовай ад 1774 году.
У 1954 годзе зь ініцыятывы Мікіты Хрушчова Крымская вобласьць была перададзена ў склад УССР на знак дружбы пры сьвяткаваньні 300-годзьдзя Пераяслаўскай Рады. У 1991 годзе па выніках усякрымскага рэфэрэндуму Крымская вобласьць пераўтворана ў Крымскую АССР у складзе УССР. У 1992 годзе рашэньнем Вярхоўнай Рады Крымская АССР перайменавана ў Рэспубліку Крым. У 1998 годзе прынята сёньняшняя канстытуцыя Крыму, адбылася зьмена афіцыйнай назвы на “Аўтаномная Рэспубліка Крым”.
У каждым разе, гучная заява расейскіх дэпутатаў можа стварыць цікавы прэцэдэнт на постсавецкай прасторы, бо па-першае, чарговага разу пераводзіць пытаньне разьвязаньня лёсу Крыму ў сфэру ўкраінска-расейскіх дачыненьняў без удзелу аўтахоннага насельніцтва паўвыспы, крымскіх татараў, а па-другое, ўзьнімае шэраг казуістычных міжнародна-праўных праблемаў. Напрыклад, ці могуць украінскія парлямэнтары ўзьнімаць пытаньне пра вяртаньне гістарычных украінскіх земляў у склад Украіны (Кубані, Варонежу, Белгараду)? Альбо ці можа Беларусь высоўваць прэтэнзіі на Смаленскую й частку Бранскае вобласьцяў, а таксама патрабаваць кампэнсацыі ад Масквы за перададзеныя Беластоцкую і Віленскую вобласьці, абапіраючыся на нелегітымнасьць савецкага пагадненьня 1939 году зь Летувой ды паваенных дамоваў з Польшчай, дзе Беларусь не была прадстаўленая ў якасьці суб’екту перамоваў. Грузінскі парлямэнт можа таксама распачаць захады наконт вяртаньня Сочы. А нямецкі Бундэстаг мусіць, у такім разе, тэрмінова вынесьці на парадак дня пытаньне вяртаньня Каралеўцу (Кёнігсбэргу) у склад Нямеччыны.
