Шаноўны чытачу! Рэдакцыя “Праўніка” радая паведаміць пра выхад другога друкаванага нумару часопіса.

Ягоная канцэпцыя ўяўляе сабой злучнасьць розных кірункаў юрыдычнай думкі, галоўнае месца зь якіх займаюць праўныя аспэкты існаваньня й функцыянаваньня сеціва Інтэрнэт, які на сёньняшні момант ёсьць ня толькі неад’емным інструмэнтам чалавечай камунікацыі й атрыманьня інфармацыі, але й прасторай, фунцыянаваньне ў якой накладае велізарны адбітак на вынаходніцтва новых формаў гаспадарчай дзейнасьці й на бесперапыннае удасканаленьне заканадаўства ў мэтах зрабіць яго адпаведным існым рэаліям. Таму большая частка артыкулаў прысьвечаная менавіта гэнаму феномену сучаснага жыцьця. Акрамя таго, актуальнымі застаюцца пытаньні аб абароне правоў чалавека, іх выкананьне й ахова дзяржаўнымі органамі, а таксама магчымасьць іх правамернага абмежаваньня. Навацыя гэтага нумару – стварэньне сэкцыі “эўрапейскае права”, якое правазнаўцы лічуць унікальнай сыстэмай праўных нормаў, падобных на якую ў сьвеце пакуль не існуе. Асобкам стаіць артыкул, прысьвечаны выбарчаму заканадаўству нашай рэспублікі, публікацыя якога была прымеркаваная да прэзідэнцкіх выбараў у сакавіку бягучага году. Мэтай артыкула ёсьць не аналізаваньне палітычных аспэктаў, зьвязаных з падзеяй, а падыход да яе зь гледзішча актуальнага беларускага заканадаўства.

У зьвязку з гэтай важнай для нас падзеяй, нам хацелася б паведаміць усім зацікаўленым чытачам аб мажлівасьці набыць асобнікі новага нумару часопіса. Бясплатна іх змогуць атрымаць першыя дзесяць асобаў, хто зробіць замову празь Інтэрнэт, даслаўшы ліст на электронную адрэсу часопіса  praunik@praunik.org.

Хацелася б яшчэ раз выказаць нашую шчырую падзяку ўсім тым, хто супрацоўнічае з часопісам, і тым, хто цёплым словам падтрымлівае нашую працу.