12 красавіка Рада Еўрапейскага Звязу выступіла з Дэкларацыяй з нагоды 60-годдзя Міжнароднага Суду ААН. Дэкларацыя адзначыла, што Міжнародны суд, які быў заснаваны Статутам ААН ў 1945 годзе і пачаў сваю непасрэдную дзейнасць у 1946 годзе, сёння цалкам даказаў сваю паўнавартаснасць у якасці краевугольнага каменю міжнароднага правапарадку.

У гэтым дакуменце Еўрапейскі Звяз яшчэ раз адзначае сваю трывалую падтрымку Міжнароднага Суду, які прызнаецца краінамі ЕЗ галоўным судовым органам Аб’яднаных Нацыяў. У Дэкларацыі Рада ЕЗ падкрэслівае, што ўсведамляе сур’ёзнасць унёску МС у працу мірнага ўрэгулявання спрэчак паміж краінамі. Суд стварыў цэлую сістэму юрыдычных рашэнняў і дарадчых меркаванняў вельмі высокага ўзроўню, якая ў сваю чаргу зараз ёсць неад’емны і надзейны сродак вызначэння нормаў міжнароднага права.

Еўрапейскі Звяз з задавальненнем звяртае ўвагу міжнароднай супольнасці на павелічэнне колькасці справаў і юрыдычных пытанняў, якія былі ўзняты перад Судом за апошнія дзесяцігоддзі. Гэты факт яскрава дэманструе ступень даверу міжнароднай супольнасці да працы Міжнароднага Суду ААН, да міжнароднага права ў цэлым і да мірнага вырашэння пытанняў і спрэчак юрыдычнымі сродкамі ў прыватнасці.

У той час, калі стварэнне спецыяльных міжнародных судоў, трыбуналаў і іншых інстытуцыяў вырашэння спрэчак сцвярджае міжнароднае прызнанне магчымасці юрыдычнага вырашэння спрэчак, Міжнародны суд застаецца галоўнай юрыдычнай установай і сэрцам міжнароднага правапарадку, замацаванага на вяршэнстве закона.

Еўрапейскі Звяз  у сваёй Дэкларацыі выкарыстаў магчымасць заклікаць усе краіны і надалей вырашаць свае спрэчкі шляхам звароту ў Міжнародны Суд і цалкам датрымлівацца рэкамендацыяў Суду.

Дэкларацыя Рады ЕС была абвешчана не толькі ад імя краінаў-удзельніцаў ЕС; да яе далучыліся такія краіны, як Баўгарыя, Румынія, Турцыя, Альбанія, Боснія і Герцэгавіна, Сербія і Чарнагорыя, Ісландыя, Нарвегія, Ліхтэнштайн, а таксама Малдова і Украіна.