Прэзыдэнт Рэспублікі Беларусь 10 красавіка 2006 года выдаў Дэкрэт № 6 “Аб унясеньні дапаўненьняў і зьмяненьняў у Дэкрэт Прэзыдэнта Рэспублікі Беларусь ад 16 сакавіка 1999 года № 11”.

Асноўнай мэтай дадзеных зьмяненьняў ёсьць спрашчэньне парадку рэгістрацыі ды ліквідацыі суб’ектаў гаспадараньня, а таксама барацьба з бюракратыяй шляхам укараненьня прынцыпу аднаго вакна.

Унесеныя дапаўненьні ды зьмяненьні ў парадак дзяржаўнай рэгістрацыі ды ліквідацыі суб’ектаў гаспадараньня павінны ствараць лепшыя ўмовы для разьвіцьця бізнэсу на Беларусі. Так, у адпаведнасьці з зьмяненьнямі, заснавальнікі (удзельнікі) ствараемай юрыдычнай асобы вызваляюцца ад абавязку прадастаўляць у рэгіструючы ворган натарыяльна засьведчаныя копіі сваіх заснавальных дакумэнтаў і пасьведчаньні аб дзяржаўнай рэгістрацыі. У выпадку неабходнасьці такімі дакумэнтамі рэгіструючыя ворганы будуць абменьвацца самастойна.

Акрамя таго, на рэгіструючы ворган ускладаецца абавязак па выдачы разам з пасьведчаньнем аб дзяржаўнай рэгітсрацыі дазволу на права вырабу пячатак ды дакумэнтаў, якія пацьвярджаюць пастаноўку на ўлік у падатковых ворганах, ворганах дзяржаўнай статыстыкі, ворганах Фонду сацыяльнай абароны насельніцтва Міністэрства працы і сацыяльнай абароны Рэспублікі Беларусь, а таксама ў арганізацыях, што ажыцьцяўляюць абавязковае страхаваньне. Фактычна, пастаноўкай на ўлік у згаданых ворганах будуць займацца рэгіструючыя ворганы.

Акрамя таго, прадугледжваецца скарачэньне тэрміну дзяржаўнай рэгістрацыі з аднаго месяцу да дваццаці дзён без магчымасьці падаўжэньня гэтага тэрміну.

Пры ажыцьцяўленьні дзяржаўнай рэгітсрацыі забараняецца спаганяць іншыя сплаты, акрамя рэгістрацыйнага збору ды дзяржаўнай пошліны за выдачу пасьведчаньня кіраўніка камэрцыйнай (некамэрцыйнай) арганізацыі.

Рэгіструючы ворган забавязаны ажыцьцяўляць праверку заснавальных дакумэнтаў на прадмет іх адпаведнасьці заканадаўству. Унесенымі зьмяненьнямі і дапаўненьнямі рэгіструючаму воргану надаецца права адмяніць рашэньне аб выдачы пасьведчаньня аб дзяржаўнай рэгістрацыі да ягонай выдачы пры ўстанаўленьні недакладнасьці прадастаўленых дадзеных.

Дэкрэт № 6 дадае яшчэ адную падставу ліквідацыі камэрцыйных арганізацыяў па рашэньні рэгіструючага воргана: сістэматычнае грубае парушэньне заканадаўства аб працы, аплата працы работнікаў на працягу трох месяцаў ніжэй за ўстаноўлены заканадаўствам мінімальны заробак.

Дэкрэтам занатавана норма аб неабходнасьці перадачы на захоўваньне ў дзяржаўны архіў першасных дакумэнтаў аб стажы і заробку асобаў, якія працуюць па наёму, да выключэньня суб’ектаў гаспадараньня з Адзінага дзяржаўнага рэгістру юрыдычных асобаў і індывідуальных прадпрымальнікаў.

Дэкрэт набывае моц зь 1 чэрвеня 2006 году.