З 7 красавіка карыстальнікі Інтэрнэту, якія пражываюць на тэрыторыі Эўрапейскага Зьвязу, атрымалі магчымасьць зарэгістраваць даменныя імёны ў зоне .EU. Па задуме стваральнікаў дамен .EU павінен ператварыцца ў альтэрнатыву дамену .COM, якім сёньня карыстаюцца шматлікія эўрапейскія кампаніі.

Рэгістрацыя ў даменнай зоне .EU была распачатая ад сьнежня 2005 году. Яна праходзіла ў тры этапы: спачатку рэгістраваліся ўладальнікі гандлёвае маркі і некамэрцыйныя арганізацыі, далей, у лютым – іншыя кампаніі, а з 7 красавіка – усе жадаючыя. Па прагнозах прыканцы 2006 году ў гэтай зоне адно арганізацыямі і кампаніямі будуць заняты каля 240 тысячаў імёнаў. Толькм цягам гадзіны з моманту адкрыцьця рэгістрацыі даменаў былі пададзеныя каля 300 тысячаў заяваў.

Кампаніі спяшаліся ўзяць сабе простыя і кароткія імёны. Так, на дамен polo.eu прэтэндавалі аўтаканцэрн Volkswagen AG, дом моды Ralph Lauren і кампанія прадуктовай прамысловасьці Nestle. У выніку дамен перайшоў ва ўласнасьць нямецкае кампаніі, бо яны падалі заяву першымі.

Паводле статыстыкі арганізацыі і грамадзяне Францыі, Нямеччыны, Нідэрляндаў і Вялікай Брытаніі праяўляюць найбольшую актыўнасьць у рэгістрацыі даменаў у зоне .EU.  Па дадзеных на 13 красавіка 2006 года:

• Нямеччына               474 835 рэгістрацыяў у зоне .EU
• Вялікая Брытанія       297 323 рэгістрацыяў у зоне .EU
• Нідэрлянды             176 514 рэгістрацыяў у зоне .EU
• Італія                     88 675   рэгістрацыяў у зоне .EU
• Швэцыя                   64 098 рэгістрацыяў у зоне .EU

Усяго на гэты момант зарэгістравана каля 1,5 мільёнаў даменных імёнаў.

Нягледзячы на тое, што Швайцарыя знаходзіцца ў цэнтры Эўропы, жыхары і арганізацыі гэтае краіны не маюць права рэгістраваць даменныя імёны ў зоне .EU. У адпаведнасьці з рэглямэнтам ЭЗ атрымаць дамен ў зоне .EU могуць толькі тыя арганізацыі і прадпрыемствы, якія зарэгістраваныя ці маюць сваё прадстаўніцтва на тэрыторыі дзяржаваў-удзельніцаў ЭЗ. Гэтаксама Ісьляндыя. Ліхтэнштайн і Нарвэгія (яны ня ёсьць чальцамі ЭЗ, але ўваходзяць у Эўрапейскую Эканамічную Прастору) ня маюць доступу да дамену .EU. Паводле меркаваньня Бэта Фера, кіраўніка EURid – кампаніі, акрэдытаванай у якасьці рэгістратара ў дамене .EU, дадзены дамен павінен быць даступным для ўсіх эўрапейскіх краінаў. Аднак, такі пункт гледжаньня не знайшоў водгукаў у Эўразьвязе.

Застаецца дадаць, што сайты афіцыйных ворганаў Эўрапейскага Зьвязу перайдуць на новы дамен адначасова 9 траўня – у дзень Эўропы.