Кіраўнік Кітаю распачаў кампанію барацьбы супраць заганаў кітайскага грамадзтва з мэтай замяніць іх сацыяльным пачуцьцём высакароднасьці і сораму. Ху Дзінтао агучыў  крытэры таго, што мусіць і што не мусіць рабіць звычайны кітайскі чыноўнік.

Такім чынам сьпіс высакародных і ганебных справаў і намаганьняў складаецца з 8 пунктаў:

• Любіце сваю краіну;  не рабіце ёй шкоды.
• Служыце народу; не рабіце яму дрэнных паслугаў.
• Займайцеся навукай; адмоўцеся ад невуцтва.
• Будзьце руплівымі; ня будзьце гультаямі.
• Будзьце задзіночанымі, дапамагайце адзін аднаму; не нажывайцеся за кошт іншых.
• Будзьце шчырымі, каб вам можна было давяраць; не выкарыстоўвайце этыку і мараль для сваёй выгоды.
• Будзьце дысцыплінаванымі і законапаслухмянымі; не дапускайце хаосу і беззаконьня.
• Жывіце адкрыта, рабіце шчырыя намаганьні; не паглыбляйцеся ў раскошу і задавальненьне.

Прафесар філязофскае навукі Хан Цынсян (Han Qingxiang) адзначае, што некаторыя прадстаўнікі грамадзтва наагул страцілі пачуцьцё розьніцы паміж дабром і злом. Чынавества заўсёды займала асобае мейсца ў кітайскім грамадстве і карысталіся шматлікімі прывілеямі (у адпаведнасьці з законам ці нават у абыход яго). “Нягледзячы на тое, што большасьць зь іх ёсьць добра дысцыплінавымі, усё ж пэўная частка чыноўнікаў, якія знаходзяцца пры вельмі важных пасадах, сапраўды не служаць свайму народу і краіне, - адзначыў прафэсар. – Яны дазваляюць сабе займацца задавальненнем сваіх патрэбаў, што наагул забрудзіла сацыяльную прастору і атмасфэру.”

Арганізацыйны Дэпартамент Камуністычнае партыі вырашыў ужываць дадзены ліст дазволенага і недазволенага як крытэр для прызначэньня руплівых і здольных асобаў на чынавенскія пасады. Прадстаўнікі Камуністычнае партыі ўпэўнены, што гэта пазытыўна паўплывае ня толькі на сыстэму афіцыйных інстытуцыяў, але і на грамадзтва ўвогуле. У выніку дадзены спіс ператварыўся ў пэўныя маральныя стандарты для ацэнкі працы, паводзінаў і здольнасьцяў кітайскіх чыноўнікаў.

Такім чынам, найбуйнейшая ў сьвеце камуністычная партыя Кітаю спрабуе аднавіцца ва ўмовах незадаволенасьці насельніцтва карупцыяй і маральнай разбэшчанасьцю кітайскага чынавенскага апарату. 

Як бы там ні было, госьці Алімпійскіх гульняў 2008 ў Пэкіне сустрэнуць шчырых і ветлівых грамадзянаў Кітаю, гатовых працягнуць руку дапамогі і зрабіць бясплатную фрызуру. Як адзначае Shanghai Daily, кітайскія афіцыйныя асобы ўжо распачалі намаганьні па давядзеньні і ўвасабленьні згаданых вартасьцяў у жыхарах Пэкіну. Галоўнае да 2008 году не перастарацца.