Еўрапейскі Парламент распачынае шэраг дзеянняў па забеспячэнні празрыстасці і дэмакратычнага кантролю за дзейнасцю інстытуцыяў ЕЗ. 6 красавіка 2006 былі прыняты два даклады, у якіх дэпутаты заклікаюць Раду забяспечыць удзел грамадства ў працэсе стварэння новых заканадаўчых актаў і патрабуюць ад Камісіі перагледзіць існуючыя правілы ды прадаставіць грамадскасці рэальны доступ да дакументаў Еўрапарламенту, Рады і Камісіі.

Празрыстасць і дэмакратычны кантроль інстытутаў ЕС ёсць найбольш важныя падставы для грамадскага даверу да самаго Звязу. Зыходзячы менавіта з гэтага разумення, шостага красавіка дэпутаты ўнеслі ў Еўрапейскі Парламент прапанову перагледзіць сучаснае еўрапейскае заканадаўства, каб забяспечыць права грамадскасці на ўдзел у дэбатах у Радзе ЕЗ і ў падрыхтоўцы новых дакументаў.

Заканадаўства ЕС наконт грамадскага доступу да тэкстаў і дакументаў інстытуцыяў ЕС ёсць вынікам працяглых перамоваў паміж Парламентам і Радай у 2001 годзе. Але тады не былі ўрэгуляваны некаторыя падставовыя пытанні сферы, што патрабуе рэфармавання.

Па-першае, заканадаўства, якое неабходна перагледзіць, павінна прадастаўляць доступ да ўсіх падрыхтаваных дакументаў, звязаных з заканадаўчай працэдурай, а таксама да ўсіх запісаў дэбатаў Рады ЕЗ, калі Рада займаецца распрацоўкай новага заканадаўства. Па-другое, сучаснае заканадаўства трэба рэфармаваць, каб акрэсліць, якім чынам магчыма класіфікаваць дакументы як канфедэнцыйныя. З пункту гледжання дэпутатаў, дакументы не павінны набываць грыф сакрэтнасці толькі таму, што таго жадаюць службоўцы.

Акрамя таго, прапануюцца нормы, якія тычацца канкрэтных дзеянняў Рады ў гэтай галіне, у тым ліку, трансляцыі грамадскіх слуханняў усімі магчымымі сродкамі масавай інфармацыі, нават праз інтэрнэт, а таксама публікацыі заканадаўчых дакументаў на ўсіх афіцыйных мовах ЕЗ.

Рэформа еўрапейскага заканадаўства Еўрапарламентам павінна стаць адным з сродкаў кантролю насельніцтва краінаў ЕЗ за дзейнасцю інстытцыяў Звязу ў сферы заканадаўства, што ёсць неад’емным элементам дэмакратыі.