29 сакавіка ў Міністэрстве Замежных Справаў Беларусі адбыўся семінар “Аб некаторых тэматычных аспектах правоў на інтэлектуальную ўласнасць і Пагаднення СГА ў гандлёвых аспектах правоў на інтэлектуальную ўласнаць”. Падчас семінару было абвешчана аб тым, што Беларусь распачала складанне выніковых дакументаў па далучэнні да Сусветнай Гандлёвай Арганізацыі.

Семінар быў арганізаваны Міністэрствам Замежных Справаў (МЗС) Беларусі пры падтрымцы Сусветнай арганізацыі інтэлектуальнай уласнаці і пры ўдзеле Нацыянальнага цэнтру інтэлектуальнай уласнасці.

На семінары было падкрэслена, што кола пытанняў, якія тычацца аховы правоў на інтэлектуальную ўласнаць, ёсць на бягучы момант найбольш распрацаванае з пункту гледзішча забавязванняў нашай краіны перад СГА. Як паведамляе БЕЛТА, намеснік кіраўніка галоўнага ўпраўлення каардынацыі знешнеэканамічнай дзейнасці МЗС Антон Кудасаў адзначыў, што “беларускае заканадаўства ў галіне інтэлектуальнай уласнасці ёсць адным з самых сучасных у свеце і паспяхова прайшло экспертызу сур’ёзных міжнародных арганізацыяў”.

Акрамя таго, было адзначана, што гэты семінар павінен стаць першым у серыі семінараў, на якіх будуць абмяркоўвацца і распрацоўвацца выніковыя дакументы па далучэнні да СГА. На думку Кудасава, “праца над імі не павінна заняць шмат часу, і мы хутка здолеем стаць сябрамі СГА. Гэта сведчыць аб тым, што стандарты аховы, якія прадастаўляюцца нашым распрацоўнікам тэхналогіяў, вынаходнікам, праграмістам, вельмі прасунутыя і будуць выкарыстоўвацца і на знешніх рынках”.

Нагадаем, што Сусветная гандлёвая арганізацыя ёсць заснаванаю ў 1995 годзе глабальнаю міжнароднаю арганізацыяй, якая займаецца правіламі міжнароднага гандлю. Нарматыўную падставу для СГА ствараюць пагадненні, якія прымаюцца, падпісваюцца і ратыфікуюцца большасцю краінаў-удзельніцаў міжнароднага гандлю. Галоўная мэта СГА – дапамога вытворцам тавараў і паслугаў, экспарцёрам і імпарцёрам у ажыццяўленні бізнэсу.