Ад 12 сакавіка Вэнэсуэла мае новую дзяржаўную сымболіку. На сьцягу краіны, які складаецца з трох пасаў – жоўтага, блакітнага і чырвонага – зьявілася восьмая зорка, што сымбалізуе правінцыю Гаяна. Акрамя таго на сьцягу знайшлі адлюстраваньне сымбалі, зьвязаныя з карэннай індзейскай культурай.

Такім чынам, адгэтуль на сьцягу Вэнэсуэлы можна пабачыць лук, стрэлы а таксама мачэтэ, якім традыцыйна карыстаюцца жыхары індзейскіх вёсак. Зьмена колькасьці зорак на сьцягу тлумачыцца неабходнасьцю выправіць “гістарычную памылку”. Сучасная Вэнэсуэла паўстала ў 19 стагодзьдзі зь сямі правінцыяў, а восьмая – Гаяна – далучылася да іх пазьней.

Ініцыятарам зьменаў сымболікі стаў прэзыдэнт гэтае паўдзённа-амэрыканскае краіны Уга Чавэс, які вырашыў унесьці навацыі ня толькі ў сьцяг, але і ў герб і гімн.

На гербе краіны ёсьць выява каня, што бяжыць у правы бок. Пры гэтым ягоны лоб зьвернуты назад. Чавэсу, аднак, аказаўся больш да спадобы герб, на якім конь мае бегчы ў левы бок, а ягоная галава скіраваная наперад. Некаторыя экспэрты лічаць, што Чавэс, вядомы сваімі левіцовымі поглядамі і антыамэрыканскай рэторыкай, вырашыў зьмяніць напрамак руху каня ў адпаведнасьці з сваім палітычным курсам.

З прычыны прэзэнтацыі новае сымболікі 12 сакавіка, якое адзначаецца ў Вэнэсуэле як дзень сьцягу, ў Каракасе меў адбыцца вайсковы парад. У сваю чаргу вэнэсуэльская апазыцыя назвала зьмену сымболікі адно растратай дзяржаўных грошаў.