Паводле дадзеных Міжпарлямэнцкага зьвязу ў 2005 годзе па ўсім свеце зафіксаваная рэкордная колькасьць жанчынаў-дэпутатак.

Але ўсё адно іх няшмат – 16,3% ад агульнай колькасці парлямэнтараў. Для параўнаньня, у 2004 годзе іх было 15,7%, а у 1995 годзе – 11,3%. Больш за ўсё жанчынаў-парлямэнтарак ў краінах паўночнае  Эўропы, дзе жанчыны складаюць да 40% ад складу парлямэнту. Менш за ўсё – у арабскіх краінах, дзе доля жанчынаў-дэпутатак ня больш за 8%. У пяцерцы лідэраў – Швэцыя, Нарвэгія, Данія і Фінляндыя. Але яны займаюць мейсцы ад 2-га да 5-е, а на першым – Руанда, дзе жанчыны складаюць 48,8% парлямэнту.

Беларусь займае 21 мейсца – 29% жанчынаў (32 мандаты з 110). Што тычыцца іншых постсавецкіх краінаў, то Летува тут на 41 мейсцы, Малдова – на 42-м, Эстонія – на 60-м, Узбэкістан – на 65-м. Астатнія былыя савецкія краіны – па-за першай сотняй.

Экспэрты зазначаюць, што чым вышэйшы ўзровень прыняцьця рашэньняў, тым меней у гэтым працэсе ўдзельнічаюць жанчыны. У Беларусі толькі некалькі жанчынаў уваходзіць у склад Рады Міністраў і працуюць у ранзе амбасадараў, а на пасадзе старшыні абласнога выканаўчага камітэта жанчынаў няма зусім.