Брытанцы вядомыя ва ўсім сьвеце як аматары братоў нашых меншых. Пры гэтым іх любоў з кожным годам расьце. Нават паляваньне на лісаў з сабакамі было забаронена Парлямэнтам. На тых жа, хто кепска ставіцца да хатніх жывелаў, таксама ёсьць управа – Каралеўскае таварыства ў папярэджаньні жорсткага абыходжаньня з жывёламі.

Аднак брытанцы палічылі, што гэтых прынятых мераў недастаткова для абароны правоў жывёлаў. Таму, міністэрства ў справах навакольнага асяродзьдзя рыхтуе адпаведны законапраект. У адпаведнасьці зь ім хатнія жывёлы атрымаюць паўнацэнныя правы, за парушэньне якіх уладальнікі будуць несьці адказнасьць у выглядзе штрафу да 5 тысячаў фунтаў альбо турмы.

Законапраектам прадугледжвае права пітомцаў на датрымліваньне дыеты, вартыя ўмовы пражываньня, наяўнасьць ці адсутнасьць кампаніі ў залежнасьці ад стану здароўя і іншых біялягічных чыньнікаў, а таксама права на рэгулярныя праверкі на прадмет незвычайных паводзінаў і абароны аб болю, пакутаў, траўмаў і хваробаў. Нагляд за выкананьнем правоў хатніх жывёлаў плянуюць перадаць у кампэтэнцыю спэцыяльных супрацоўнікаў мясцовых муніцыпалітэтаў, якія атрымаюць права на ўваход у дом і канфіскацыю жывёлаў у гаспадароў, якія будуць парушаць правы сваіх пітомцаў.

Неабходныя зьвесткі пра выкананьне памянёных правілаў уладальнікі катоў, сабакаў, трусаў і іншых жывёлаў здолеюць атрымаць з спэцыяльнага “кодэксу паводзінаў”. Гэты кодэкс будзе індывідуальна складацца для кожнага віда хатніх жывёлаў.

Напрыклад, варыянт кодэксу для аматараў катоў складаецца аж з 18(!!!) старонак тэксту . На гэтых 18 старонках гаспадарам катоў і котак забараняецца сярод іншага не выпускаць сваіх жывёлаў з дому на ноч, кастрыраваць катоў ва ўзросьце чатырох месяцаў, не даваць коткам нараджаць больш за 18 кацянятаў у год. Патрабуецца забясьпечыць хатнім пітомцам магчымасьць хаваццца ад чужых вачэў (напрыклад, у вялікай картоннай скрыні), сачыць за тым, каб каты атрымлівалі дастаткова “разумовай стымуляцыі”, кантраляваць вагу сваіх падапечных і забясьпечваць магчымасьць адасабленьня для прыродных патрэбаў.

Аналягічныя “кодэксы” плянуецца прыняць для іншых відаў хатніх жывёлаў. Але неабходна таксама памятаць, што законапраект прадугледжвае толькі абарону правоў хрыбетных жывёлаў.