24 лютага Цэнтар праўнай падтрымкі Беларускай асацыяцыі журналістаў прэзэнтаваў праект Закону “Аб праве на атрыманьне інфармацыі”. На абмеркаваньне гэтага праекту былі запрошаныя прадстанікі рэгіянальных сродкаў масавай інфармацыі, НДА ды вядомыя юрысты. Прысутнічаў і прадстаўнік “Праўніка”.

Законапраект быў падрыхтаваны шэрагам вядомых беларускіх спэцыялістаў у галіне свабоды слова (М. Пастухоў, А. Бастунец, Э. Мельнікаў і г.д.). Аўтары таксама карысталіся досьведам і парадамі шэрагу вядомых міжнародных арганізацыяў, такіх як, напрыклад, Article 19 (Лёндан). Як падкрэсьліваюць ініцыятары закону, гэты праект разьлічаны на той час, калі ў Беларусі адбудуцца адпаведныя структурныя зьмены, што дазволяць ажыцьцявіць канкрэтныя пункты праекту на практыцы. Больш за тое, мяркуецца, што на час, калі гэты закон будзе запатрабаваны, Беларусь далучыцца да Рады Эўропы й, адпаведна, ратыфікуе Эўрапейскую Канвэнцыю аб абароне правоў чалавека. Падобныя нарматыўныя акты прынятыя бадай што ва ўсіх эўрапейскіх краінах, бо маюць фундамэнтальнае значэньне дзеля гарантаваньня правоў і свабодаў чалавека. Гэткія нарматыўныя акты (у адрозьненьне ад, скажам, Законаў аб СМІ) разьлічаныя ня толькі на журналістаў, але й на ўсіх грамадзянаў краіны, бо забясьпечваюць права на атрыманьне грамадзянінам своечасовай, праўдзівай ды бясплатнай інфармацыі. У прыватнасьці, мяркуецца, што ня можа быць абмежаваны доступ да інфармацыі аб законах ды іншых нарматыўных праўных актох, надзвычайных сытуацыях, памерах залатога запасу ды дзяржаўных валютных рэзэрвах Беларусі, аб стане навакольнага асяродзьдзя, аховы здароўя, санітарыі, дэмаграфіі, адукацыі, культуры, сельскай гаспадаркі, аб стане злачыннасьці, праўным статусе, ліку й дзейнасьці дзяржаўных органаў ды арганізацыяў, органаў мясцоўвага самакіраваньня, аб грашовым прыбытку дзяржаўных службоўцаў, а таксама прывілеях, кампэнсацыях і льготах, што надаюцца грамадзянам, службовым асобам ды арганізацыям, аб стане здароўя службовых асобаў дзяржавы, аб фактах парушэньня правоў і свабодаў грамадзяніна, а таксама правоў ды законных інтарэсаў юрыдычных асобаў.

Вялікую дыскусію выклікалі пытаньні канкрэтызацыі санкцыяў стасоўна службовых асобаў, што замінаюць вольнаму доступу да адкрытай інфармацыі, неабходнасьці даступнасьці заканадаўчай базы ды зьвестак пра падставовыя міністэрствы й ведамствы ў электронным сеціве, мэханізму нагляду за забесьпячэньнем даступнасьці права на інфармацыю. Удзельнікі дыскусіі прышлі да пэўнае згоды стасоўна гэтых і шэрагу іншых пунктаў ды выпрацавалі папраўкі да законапраекту. У прыватнасьці, была неаспрэчна прызнана неабходнасьць фіксацыі ў законе права на атрыманьне грамадзянам інфармацыі ад усіх дзяржаўных органаў ды службовых асобаў у той мове, у якой яна запрошваецца.

З праектам закону можна азнаёміцца на сайце Беларускай асацыяцыі журналістаў.