Брытанскi пiсьменьнiк Фiлiпп Пулман i дырэктар Каралеўскага нацыянальнага тэатру Нікалас Хітлер распачалі кампанію за адмену брытанскага закона аб блюзьнерстве трохсотгадовай даўніны.
Паводле іх меркаваньня, адмена ўсіх законаў аб блюзьнерстве неабходна для таго, каб рэлігія, як і любая іншая форма чалавечага мысьленьня, стала прадметам свабоднай, адкрытай дыскусіі. Акрамя таго, яны мяркуюць, што адменай закону аб блюзьнерстве брытанскі Ўрад прадэманструе сваю прыхільнасьць да свабоды веравызнаньня.
Закон аб блюзьнерстве існуе ў Вялікай Брытаніі з 1697 году. З 1938 году яго дзеяньне адносіцца толькі да Англіканскай царквы. Пад дзеяньне гэтага закону траплялі ў розныя часы многія літаратурныя творы. Апошнім асуджаным на падставе закону аб блюзьнерстве ў Вялікай Брытаніі быў рэдактар газэты «Gay News». У 1977 годзе ён быў пакараны ўмоўным заключэньнем і штрафам за публікацыю верша аб каханьні рымскага цэнтурыёна да Езуса Хрыста.
У бліжэйшы час да гэтай кампаніі могуць далучыцца іншыя аўтары-ўдзельнікі арганізацыі English PEN, якія выступаюць за свабоду слова ў друку. Дарэчы, пасьля публікацыі ў 1988 годзе «Сатанінскіх вершаў» Салмана Рушдзі мусульманская грамадзкасьць спрабавала прыцягнуць яго да суду ў Вялікай Брытаніі за непавагу да рэлігіі. Але раман тычыўся ісламу і таму твор не падпадаў пад дзеяньне брытанскага закона аб блюзьнерстве.
