Згодна з выракам суду места Аквіла, што ў Італіі, прэзыдэнт італійскага зьвязу мусульманаў Адэль Сьміт атрымаў восем месяцаў турэмнага зьняволеньня за зьнявагу хрысьціянскае сымболікі.

Як паведамляе агенцыя АНСА, падставай дзеля гэткага рашэньня сталася тое, што Сьміт выкінуў праз вакно палаты шпіталю, у якім знаходзілася ягоная маці, Укрыжаваньне.

Сьміт (нар. у 1960) ёсьць італійцам шкоцкага паходжаньня, які прыняў іслам у 1987 годзе. Ён і дагэтуль быў вядомы сваім непаважлівым стаўленьнем да хрысьціянскіх сымбаляў. Два гады таму ён патрабаваў зьняць выявы Ўкрыжаваньня ва ўсіх клясах у школах. На думку Сьміта, Укрыжаваньне абражала рэлігійныя пачуцьці мусульманаў (складаюць 1,4% насельніцтва Італіі), што наведваюць італійскія школы.