Згодна зь лістападаўскім рэйтынгам, створаным Інстытутам манітараваньня мэдыяў, "Gazeta Wyborcza" ёсьць найбольш уплывовым сродкам масавае інфармацыі ў Польшчы.

Крытэрам для аналізу зьяўляецца цытаваньне паасобных мэдыяў у іншых сродках масавае інфармацыі. Рэйтынг быў створаны на падставе 4946 прэсавых артыкулаў, тэлевізыйных і радыёпраграмаў, у якіх зьмешчана 6013 спасылкаў на іншыя мэдыі.

У рэйтынгу за лістапад найбольш цытаванай была "Gazeta Wyborcza", на якую спасылаліся 1303 разы. На другім мейсцы з 1066 спасылкамі знаходзіцца іншы ўплывовы штодзёньнік "Rzeczpospolita", а на трэцім – "Życie Warszawy" з 538 спасылкамі. Розьніца паміж першым і другім мейсцамі павялічылася ад 164 цытаваньняў матэрыялаў у кастрычніку да 237 – у лістападзе.

Найбольш уплывовым тыднёвікам стаўся "Wprost", які з 179 спасылкамі апынуўся на 6 мейсцы, апярэдзіўшы сваіх канкурэнтаў з часапісаў "Polityka" (119, 10 мейсца) i "Newsweek" (102, 13 мейсца).

Сярод радыёвых станцыяў найбольш цытаваным зьяўляецца Радыё Zet, якое з 132 спасылкамі займае 9 мейсца. На 12 неспадзявана задэбютавала ультракансэрватыўнае Радыё Марыя з 115 спасылкамі. На станцыю з Торуня найчасьцей спасылаліся ў зьвязку з выказваньнямі палітыкаў, а найперш чальцоў ураду ў ейным этэры.

Адметным фактам ёсьць тое, што сярод 15 найбольш цытаваных мэдыяў прысутнічаюць 12 прэсавых выданьняў і 3 радыёстанцыі, але няма жаднага інтэрнэтавага парталу ці тэлевізіі. На найбольш цытаваны партал Onet.pl спасылаліся толькі 58 разоў. Сярод тэлевізіяў найбольш уплывовай сталася TVP1, якая ў лістападзе апярэдзіла TVN (67 і 64 адпаведна).