Абвяшчаецца конкурс на ўдзел у 1-ай і 2-ой сэсіях

Школы правоў чалавека для моладзі

1-я сэсія: 15-21 студзеня 2006 году (ад’езд 14 студзеня, вяртаньне 22 студзеня)

2-я сэсія: 5-11 лютага 2006 году (ад’езд 4 лютага, вяртаньне 12 лютага)

Падача заявак на ўдзел

Для ўдзелу ў Школе прэтэндэнт запаўняе рэгістрацыйную форму разам з CV (сьціслае аўтабіяграфічнае рэзюмэ), рэкамэндацыйным лістом ад арганізацыі (не абавязкова) і высылае іх электроннай поштай на адрас:  belschool@gmail.com

На падставе дасланых дакумэнтаў будуць сфармаваныя групы ўдзельнікаў, якім будзе паведамлена інфармацыя арганізацыйнага пляну.

Тэрмін падачы рэгістрацыйных формаў:

1 сэсія:  да 5 студзеня 2006 году

2 сэсія: да 25 студзеня 2006 году

Кантактная асоба: Тацяна Рэвяка. Рэгістрацыйную форму й падрабязнасьці можна атрымаць праз belschool@gmail.com.

Агульныя інфармацыі пра Школу правоў чалавека

Ад пачатку 2006 году пачынае працу Школа правоў чалавека, арганізаваная міжанароднай супольнасьцю праваабарончых арганізацыяў. Мэтавымі групамі Школы зьяўляюцца: моладзь, выкладнікі, журналісты. На студзень-жнівень 2006 году заплянаванае правядзеньне 6 сэсіяў (кожная сэсія доўжыцца 7-9 адукацыйных дзён): 4 сэсіі для чатырох групаў моладзі, 1 сэсія для выкладнікаў і 1 сэсія для журналістаў. Кожная група ўдзельнікаў – 18-22 чалавекі.

Месца правядзеньня: Украіна, Летува. Працоўныя мовы: беларуская й расейская.

У межах праграмы Школы ўдзельнікі азнаёмяцца зь гісторыяй і філязофіяй правоў чалавека, а таксама сродкамі іх абароны на нацыянальным і міжнародным узроўнях.

Школа правоў чалавека для моладзі

Да ўдзелу запрашаецца беларуская моладзь, зацікаўленая ў набыцьці ведаў у галіне правоў чалавека (век: ад 18 да 25 гадоў).

Школа правоў чалавека для выкладнікаў

Да ўдзелу запрашаюцца выкладнікі прадметаў гуманітарнага цыклю, правоў чалавека ў школах і сярэдніх спэцыяльных навучальных установах.

Школа правоў чалавека для журналістаў

Да ўдзелу запрашаюцца студэнты факультэтаў журналістыкі дзённай і завочнай формаў навучаньня, маладыя журналісты (век: 18-25 гадоў).

Перавага будзе аддавацца ўдзельнікам, якія арыентуюцца ў грамадзкай праблематыцы, зацікаўленыя ў атрыманьні ведаў у галіне правоў чалавека, якія жадаюць і гатовыя дзейнічаць на карысьць іх абароны. Выкладнікамі Школы будуць прадстаўнікі вядучых праваабарончых арганізацыяў Беларусі ды іншых краінаў, вядомыя і аўтарытэтныя спэцыялісты ў галіне правоў чалавека і права. Да ўдзелу ў адукацыйным працэсе будуць прыцягнутыя прадстаўнікі міжнародных праваабарончых арганізацыяў.

Удзельнікі Школы, якія пасьпяхова пройдуць курс, атрымаюць адпаведныя сэртыфікаты.

Удзел бясплатны. Арганізатары Школы бяруць на сябе пакрыцьцё транспартных выдаткаў, пражываньня й харчавання ўдзельнікаў.