Палата прадстаўнікоў прыняла ў другім чытаньні законапраект аб унясеньні зьмяненьняў у заканадаўства ў пытаньнях барацьбы з фінансаваньнем тэрарыстычнай дзейнасьці ў Беларусі. Як лічаць ў Палаце, дакумэнт распрацаваны адмыслова для прывядзеньня заканадаўства ў адпаведнасьць з міжнароднай канвэнцыяй па барацьбе зь фінансаваньнем тэрарызму.

Дэпутаты прынялі зьмяненьні ў Крымінальны Кодэкс, якімі замацоўваецца, што “прадастаўленьне ці збор грашовых сродкаў, каштоўных папераў ці іншай маёмасьці дзеля іх выкарыстаньня ў фінансаваньні тэрарыстычнай дзейнасьці караецца пазбаўленьнем волі на тэрмін ад 8 да 12 гадоў з канфіскацыяй маёмасьці. Гэтае ж злачынства, учыненае паўторна ці арганізаванай групай, ці службовай асобай з выкарыстаньнем сваіх службовых паўнамоцтваў цягнуць пазбаўленьне волі ад 8 да 15 гадоў з канфіскацыяй маёмасьці ”. У той жа час законапраект прадугледжвае  вызваленьне ад крымінальнай адказнасьці, калі асоба своечасова паведаміла аб учыненым і спрыяла прадухіленьню тэрарыстычнага акту і раскрыцьцю злачынства. У законапраекце удакладняюцца тэрміны “фінансаваньне тэрарыстычнай дзейнасьці”, “тэрарыстычная арганізацыя”.

Рашэньне аб прызнаньні  арганізацыі тэрарыстычнай будзе прымаць Вярхоўны Суд на падставе заявы Рэспубліканскай пракуратуры. У гэтым выпадку дзейнасьць арганізацыя на тэрыторыі Беларусі забараняецца, а самая арганізацыя ліквідуецца.