Брытанская контвыведка MI5 упершыню апублікавала імёны, фота і біяграфіі ўсіх сваіх дырэктараў. Гэтыя дадзеныя, згодна з распараджэньнем цяперашняе дырэктаркі MI5 Элізы Мэнэнгэм-Буллер, зьмешчаныя на ўэб-сайце службы.

Дагэтуль імёны дырэктараў MI5 (тым больш – іхныя здымкі) не былі вядомыя па-за межамі службы. Зараз іх поўны сьпіс можна знайсьці на афіцыйным сайце http://www.mi5.gov.uk. Першаю кіраўнічкай контрвыведкі, чыё імя стала вядомым грамадзкасьці, стала Стэла Рэмінгтан, якая займала гэтую пасаду ад 1992 да 1996 году. На цяперашні час MI5 перажывае істотную рэформу, прычым ня толькі ў сфэры палітыкі адкрытасьці. Да 90-ых гадоў контвыведка займалася перш за ўсё супрацьдзеяньнем КДБ СССР і выведкам усходнеэўрапейскіх краінаў. Цяперашняя дырэктарка імкнецца ператварыць MI5  у вядучую брытанскую агенцыю ў барацьбе з тэрарызмам, для чаго адкрыта вярбуе супрацоўнікаў.