Бэльгійскі Льеж названы самым крымінагенным местам на тэрыторыі Эўразьвязу. Аб гэтым сьведчыць адмысловае дасьледваньне Эўракамісыі, якое ладзілася на падставе дадзеных 2001 году з больш чым 250 местаў ва ўсіх краінах-сяброх ЭЗ.

Льеж, што знаходзіцца ў франкамоўнай Валёніі, налічвае каля 185 тыс. жыхароў і зьяўляецца пятым паводле колькасьці насельніцтва местам Бэльгіі. 10% насельніцтва места складаюць грамадзяне іншых краінаў ЭЗ, а яшчэ 6% – грамадзяне дзяржаваў, што ў ЭЗ не ўваходзяць. Беспрацоўе сягае 24% (сярод жанчынаў – 28%).

У Льежы колькасьць зарэгістраваных злачынстваў складае 256 на 1000 жыхароў. Для параўнаньня, у іншых мястох Бэльгіі гэты паказьнік наступны: у Антвэрпэне – 116, Бруґґэ – 61, Брусэлі – 153, Гэнце – 96, Шарлеруа – 144 злачынствы на 1000 жыхароў.

Сярод іншых буйных местаў Эўразьвязу ў Парыжы ўзровень крымінагеннасьці сягае 146, Ліёне – 110, Марсэлі – 119, Рэймсе – 81, Страсбурзе – 126, Бэрліне – 168, Брэмэне – 143, Гамбурзе – 184, Гановэры – 140, Калёніі – 124, Ліпску – 136, Мюнхэне – 95, Франкфурце-на-Майне – 151, Франкфурце-на-Одры – 215, Бірмінгэме – 72, Бэлфасьце – 137, Глазга – 147, Кардыфе – 48, Лёндане – 61, Лівэрпулі – 66, Эдзінбурзе – 116, Барсэлёне – 43, Валенсыі – 57, Мадрыдзе – 38, Відні – 29, Амстэрдаме – 182, Гаазе – 124, Ратэрдаме – 136, Гётэборзе – 204, Мальмё – 161, Стакгольме – 204, Капэнгагэне – 149, Орхусе – 137, Палерма – 63, Гэльсынкох – 151, Лісабоне – 87, Люксэмбурзе – 112, Рызе – 26 злачынстваў на тысячу жыхароў.

Найбольш крымінагеннымі местамі ЗША зьяўляюцца: Камдэн (штат Новы Джэрсі), Дэтройт (штат Мічыган), Сэнт-Луіс (штат Місуры).