Канстытуцыйны Суд Паўдзённа-Афрыканскай Рэспублікі 1 сьнежня 2005 года вырашыў, што забарона на аднаполыя шлюбы не адпавядае канстытуцыі краіны.

Дзейны закон вызначае шлюб як “зьвяз паміж мужчынам і жанчынай”. Аднак, у мінулым годзе Найвышэйшы апэляцыйны суд краіны пры разглядзе позыва пары лесбіек вынес рашэньне, што гэткае палажэньне закону дыскрымінуе гомасэксуалістаў. Як адзначыў у сваім рашэньні суд, вызначэньне шлюбу ў законе пазбаўляе аднаполыя пары статусу і заканадаўчых прывілеяў, якія маюць рознаполыя пары, а таксама супярэчыць канстытуцыі краіны.

Такім чынам, апэляцыйны суд краіны дазволіў шлюб дзьвюм лесбійкам, вызначыўшы тым самым шлюб як “зьвяз паміж дзьвюма асобамі”. Але нягледзячы на рашэньне апэляцыйнага суду, пара лесбійкаў ня здолела афіцыйна зарэгістраваць свой шлюб. Міністэрства ўнутраных справаў не пагадзілася з вынесеным рашэньнем і падало скаргу на такое рашэньне ў Канстытуцыйны Суд краіны.

Канстытуцыйны Суд ПАР адхіліў скаргу Міністэрства, захаваўшы моц рашэньня апэляцыйнага суду. Акрамя таго, Канстытуцыйны Суд зьвярнуўся да Парлямэнту з просьбай аб зьмяненьні сямейна-шлюбнага заканадаўства цягам году.