Ад 5 сьнежня 2005 года ў Вялікай Брытаніі набывыў моц прыняты ў мінулым годзе закон аб цывільных партнэрствах, якім дазваляецца афіцыйная рэгістрацыя аднаполых шлюбаў (Civil Partnership Act 2004). У адпаведнасьці з прадугледжаным нарматыўна-прававым актам першыя рэгістрацыі павінны пачацца з 21 сьнежня 2005 года.

У Ангельшчыне, Валіі і Паўночнай Ірляндыі любая пара старэйшая за 18 гадоў (16 гадоў пры згодзе бацькоў), а ў Шкотыі – старэйшая за 16 гадоў зараз маюць права на заключэньне грамадзянскага партнэрства (16 гадоў у Вялікай Брытаніі ёсьць “узростам згоды”, калі чалавек па закону можа свабодна ўступаць у сэксуальныя стасункі).

Цывільнае партнэрства – адмысловы від легальных стасункаў, прызначаных для аднаполых параў. Пры ўступленьні ў гэткае партнэрства аднаполыя пары паводле праўнага статусу будуць прыраўнаныя да сем’яў. Партнэры змогуць разьлічваць на выкарыстаньне палёгкаў пры беспрацоўі, атрыманьне выплатаў па нагляду за дзіцём, а таксама пэнсыйных выплатаў. Закон прадугледжвае спрошчаную працэдуру прызнаньня стасункаў на выпадак хваробы альбо сьмерці партнэра. Некаторым парам закон аб цывільным партнэрстве дапаможа вырашыць іміграцыйныя праблемы.

Паміж шлюбам і цывільным партнэрствам можна вылучыць два галоўных адрозьненьня. Шлюб можа быць заключаны ў царкве і ў цывільнай установе, а цывільнае партнэрства можа быць зарэгістравана толькі ў адпаведнай установе. Акрамя таго, шлюб лічыцца заключаным пасьля памены вуснымі абяцаньнямі, а партнэрства вымагае подпісаў абодвух бакоў на пасьведчаньні аб рэгістрацыі.