Ad lutaha 2006 hodu malazyjskija ŭłady planujuć spraścić paradak atrymańnia vizaŭ dla ŭjezdu ŭ hetuju krainu.

Kožny čałaviek, jaki žadaje naviedać Malajzyju, zmoža zapoŭnić vizavuju ankietu, što źmieščana ŭ internecie, i adpravić jaje na paznačany adras. Kali pytańnie vydačy vizy razhledžana stanoŭča, zamiežnik zmoža apłacić konsulski zbor on-line, paśla čaho razdrukavać paćvierdžańnie ŭ atrymańni vizy. Na hetaj padstavie pradstaŭniki pašpartnaha kantrolu i imihracyjnaje słužby buduć rabić adpaviednuju adznaku ŭ pašparcie asoby niepasredna pry prybyćci ŭ Malajzyju. Na dumku pradstaŭnikoŭ malazyjskich uładaŭ, usia pracedura zojmie prykładna sutki i dapamoža ŭ ekanomii času i srodkaŭ, nieabchodnych na atrymańnie zvyčajnaje vizy.

Hetaja naveła raspaŭsiudžvajecca nia tolki na fizyčnych asobaŭ, što žadajuć naviedać Malajzyju. Turystyčnyja agiencyi taksama zmohuć u taki sposab pradstaŭlać intaresy svaich klijentaŭ.

Vyniatkami z novych vizavych praviłaŭ źjaŭlajucca hramadzianie Serbii i Čarnahoryi dy Izrailu, jakim z palityčnych pryčynaŭ urad Malajzyi zabaraniŭ ujezd na terytoryju krainy. Kab naviedać Malajzyju, hramadzianie hetych dźviuch dziaržavaŭ musiać spačatku atrymać adpaviedny dazvoł ad tamtejšaha ŭradu.