Нарэшце адбылося тое, на што мы так доўга чакалі. Акурат праз год пасьля стварэньня юрыдычнага он-ляйн праекту зьявілася яго друкаваная вэрсыя.

Прэзэнтацыя друкаванага нумару “Праўніка” адбылася 22 лістапада ў касьцёле Сьв. Сымона й Сьв. Алены ў Менску.

Уласна часопіс ёсьць своеасаблівым працягам праекту. У ім, на думку рэдкалегіі, падаюцца самыя цікавыя і актуальныя артыкулы з сайту. Артыкулы, зьмешчаныя ў друкаваным нумары, як і на сайце, падаюцца ў двух варыянтах – па-беларуску й па-ангельску. Часопіс мае на мэце прыцягнуць большую ўвагу да праекту ня толькі з боку моладзі, але й аўтарытэтных і дасьведчаных юрыстаў, якіх, між іншым, плянуецца запрасіць ў якасьці рэцэнзэнтаў. Мы спадзяемся, што такім чынам замежныя праўнікі атрымаюць магчымасьць ня толькі пазнаёміцца з праблемамі беларускай рэчаіснасьці, але і напісаць рэцэнзію на разьмешчаны на сайце альбо ў друкаванай вэрсыі артыкул. Што, дарэчы, шчыра вітаецца.

Уласна прэзэнтацыя прайшла ў цёплай атмасфэры добразычлівасьці. Пытаньняў было шмат. Асноўным пытаньнем стала ці ня зьнікне праект пасьля заканчэньня ВНУ, бо большасьць аўтараў і раднікаў ёсьць студэнтамі старэйшых курсаў і асьпірантамі. Але мы ўвесь час знаходзімся ў пошуках новых аўтараў, і ня важна, ці зьяўляюца яны студэнтамі, асьпірантамі альбо ўжо сталымі юрыстамі. Галоўным, што мае задзіночыць усіх, ёсьць жаданьне выкладаць, вывучаць, разглядаць “Наша права – Нашай мовай”. Таму мы ласкава вітаем усіх, каму хацелася б выказацца, паразважаць ці запытацца на праўніцкія тэмы.

Прэзэнтацыю наведалі прадстаўнікі сродкаў масавай інфаомацыі, юрыдычных фірмаў, выкладаньнікі юрыдычных і паліталягічных дысцыплінаў, прадстаўнікі замежных місіяў, Пэн-цэнтру, Таварыства беларускай мовы, Беларускага калегіюму, Беларускай асацыяцыі журналістаў, Вышэйшага гаспадарчага суду і г.д. Некаторыя зь іх дагэтуль нічога ня ведалі пра “Праўнік”. Але іх цікаўнасьць да нашага праекту прыемна ўразіла.

За ўвесь вечар мы не пачулі аніводнай крытыкі ў свой бок. Мажліва, да нас паставіліся даволі лібэральна, але для нас гэта азначае толькі адное – мы робім “Праўнік” не дарма.

Шаноўныя наведвальнікі! Рэдакцыя часопісу “Праўнік” плянуе бясплатна пераслаць пэўную колькасьць паасобнікаў тым наведвальнікам інтэрнэт-старонкі, якія першымі адпішуць свае кантакты на e-mail адрэсу praunik@praunik.org. Раім пасьпяшацца, бо часопіс выдадзены малым накладам.