На паседжаньні Канстытуцыйнага Суду Рэспублікі Беларусь было разгледжана пытаньне аб парадку прадастаўленьня службовага жытла і практыкі яго рэалізацыі. Нагодай для вывучэньня гэтага пытаньня стаў зварот грамадзяніна, які пры атрыманьні службовага жытла ажыцьцявіў адцураньне кватэры, што знаходзілася ў яго ўласнасьці. Пасьля звальненьня з працы ён разам з чальцамі сваёй сям’і быў выселены з займаемага жыльлёвага памяшканьня без прадастаўленьня іншага памяшканьня.

Патрабаваньне аб адцураньні памяшканьня прад’явіла раённая адміністрацыя на падставе п. 30 Правілаў уліку грамадзянаў, якія маюць патрэбу ў паляпшэньні жыльлёвых умоваў, і прадастаўленьня жыльлёвых памяшканьняў у Рэспубліцы Беларусь. У адпаведнасьці з гэтымі Правіламі, калі грамадзяніну на момант прыняцьця рашэньня аб прадастаўленьні жыльлёвага памяшканьня належыць на праве ўласнасьці жыльлёвае памяшканьне ці ён займае яго па дамове наёму ў дамох дзяржаўнага жыльлёвага фонду (у якім не застаюцца пражываць чальцы яго сям’і), ён забавязаны правесьці адцураньне (здачу) гэтага жыльлёвага памяшканьня мясцовай Радзе дэпутатаў, выканаўчаму і распараджальнаму воргану, аганізацыі, якія прадастаўлялі такое памяшканьне.

Суд мяркуе, што патрабаваньні аб абавязковым адцураньні жыльлёвага памяшканьня ўласьнікам у выпадку прадастаўленьня яму жыльлёвага памяшканьня ў дамах дзяржаўнага жыльлёвага фонду ня могуць ужывацца пры прадастаўленьні службовага жыльля асобам, якія ўжо маюць жыльлё на праве ўласнасьці. Службовае жыльлё мае свой асаблівы статус і прадастаўляецца, паводле агульнага правіла, на час працы. Пры гэтым заканадаўства устанаўлівае, што ў выпадку спыненьня працоўных стасункаў грамадзяне маюць быць выселеныя са службовых памяшканьняў без прадастаўленьня ім іншага жыльлёвага памяшканьня, за выняткам выпадкаў, якія прадугледжвае заканадаўства.

У такім выпадку адбываецца наступная сытуацыя: калі для атрыманьня жыльлёвага памяшканьня грамадзянін адцурае ўласную кватэру альбо дом, то ў выпадку згубы права на пражываньне ў службовым памяшканьні ён застаецца наагул без жытла.

У сваім рашэньні Канстытуцыйны Суд Рэспублікі Беларусь прапанаваў Радзе Міністраў Рэспублікі Беларусь вырашыць пытаньне што да належнага праўнага рэгуляваньня прадастаўленьня службовых жыльлёвых памяшканьняў грамадзянам, якія маюць жыльлё на праве ўласнасьці.