Урад Ізраілю ухваліў законапраект аб абароне правоў непаўнагадовых, якія падазраюцца ў крымінальных злачынствах.

У адпаведнасьці з ухваленым законапраектам непаўнагадовыя маюць права на адваката з моманту іх затрыманьня. Толькі ў прысутнасьці адвакату можа быць вырашана пытаньне аб падаўжэньні тэрміну іх утрыманьня пад вартай. Акрамя таго, адвакат павінен прысутнічаць і пры прад’яўленьні абвінавачваньня непаўнагадовай асобе.

Усе слуханьні па справах непаўналетніх павінен весьці судзьдзя, які прайшоў спэцыяльную падрыхтоўку. Усе паседжаньні судоў павінны быць закрытымі. Непаўнагадовай асобе забясьпечваецца права на разуменьне таго, што яму кажуць, а дзеля дасягненьня гэтай мэты будзе наймацца перакладнік.

Законапраект таксама патрабуе выкарыстаньня такой меры крымінальнага затрыманьня як утрыманьне пад вартай толькі ў скрайніх выпадках, калі інтарэсы сьледства немагчыма абараніць іншымі спосабамі. У любым выпадку, тэрмін заключэньня ня можа быць працяглым.

Адзін з параграфаў новага законапраекту прадугледжвае незвычайную працэдуру: арышт непаўнагадовай асобы дзеля забесьпячэньня яе асабістае бясьпекі. Але выкарыстоўвацца такая мера можа толькі ў скрайніх і рэдкіх выпадках.

Сьледства ў ювэнальных справах павінна будзе весьціся больш мякімі мэтадамі, з улікам таго, што непаўгадовыя асобы менш устойлівыя да ціску і могуць прызнацца ў злачынствах, якіх яны не ўчынялі.

Забараняецца дапытваць падлеткаў у начны час, ад 22:00 да 7:00. Перад выклікам на допыт непаўнагадовага, паліцыя абавязаная паведаміць пра гэта яго бацькоў і апекуноў.